Almatyda 12 myń oryndyq Muz saraıyndaǵy kishi arenanyń tusaýy kesildi (FOTO)
ALMATY. QazAqparat - Búgin Almatyda 2017 jylǵy qysqy Ýnıversıada oıyndaryna arnalyp salynyp jatqan 12 myń oryndyq Muz saraıynyń kishi arenasy merziminen buryn qoldanysqa berildi.
Onyń ashylý rásimine qala ákimi Baýyrjan Baıbek, «Almaty q. Halyqaralyq sport jobalary dırektsııasy» memlekettik qory, osy sport nysandaryn salýshy «Bazıs» qurylys kompanııasynyń ókilderi, tanymal sport juldyzdary, BAQ ókilderi jáne qala turǵyndary qatysty.
Kórermender aldynda, arenaǵa shyqqan short-trek, hokkeı jáne mánerlep syrǵanaý sport sektsııalarynda jattyǵatyn jas sportshylar kishigirim mýzykalyq qoıylym kórsetti. Sodan soń, jınalǵan qaýymǵa uzyndyǵy 25 metrlik basseın tanystyryldy. Onda sınhrondy júzýden elimizdiń ulttyq quramasynyń qyzdary kishigirim mýzykalyq baǵdarlamasyn pash etti.
«Biz búgin 12 myń oryndyq Muz saraıynyń kishi arenasynyń jáne uzyndyǵy 25 metrlik basseınniń tusaýyn kestik. Jalpy, Muz saraıynyń qurylysy boıynsha ýaqyt kestesinen 120 kún alda kelemiz. Medeý aýdanynda salynyp jatqan 3 myń oryndyq muz arenasynyń qurylysy da ýaqyt kestesi boıynsha júrgizilip jatyr. Qudaı qalasa, aldaǵy jyly bul nysandardy tamyz aıynyń sońynda tolyǵymen qoldanysqa beremiz. Qazir qurylys jumystaryna barynsha jergilikti sapaly materıaldar qoldanyp jatyr. Jalpy, jergilikti mazmunnyń kólemi - 52-55 paıyzdy quraıdy», - dedi óz sózinde Almaty qalasy qurylys basqarmasy basshysynyń orynbasary Asqar Mapaev.
Aıta ketelik, 12 myń oryndyq Muz saraıy 2017 jylǵy qysqy Ýnıversıadanyń eń úlken jáne eń basty sport nysany bolmaq. Munda Ýnıversıadanyń ashylý jáne jabylý rásimi jáne mánerlep syrǵanaýdan jarys ótedi. Al 475 oryndyq kishi arenada qysqy Ýnıversıada barysynda kerlıngten báseke ótedi dep kútilýde. Al jarystan basqa ýaqyttarda sportshylar bul eki arenada joǵary deńgeıde ózderiniń oqý-jattyǵý jıyndaryn ótkizip turatyn bolady. Óıtkeni, munda muz aıdyndarymen qosa, boks, kúres, ústel tennısi, horeografııa, akrobatıka jáne eki trenajer zaldary, medıtsınalyq ońaltaý ortalyǵy jumys isteıdi. Sonymen qatar, bul Muz saraıy jáne Medeý aýdanynda salynyp jatqan 3 myń oryndyq muz arenasynda voleıbol, basketbol, shaǵyn fýtbol jáne basqa da sporttyq jarystardy, sondaı-aq keń kólemdi mádenı sharalar ótkizýge de bolady.
