Almatyda 110 naýqas modýldik aýrýhanadan jańa bólimshege aýystyryldy

I.Jekenova atyndaǵy «Qalalyq klınıkalyq juqpaly aýrýlar aýrýhanasy» sharýashylyq júrgizý quqyǵyndaǵy MKK jańa fılıaly jumysyn 30 qarashadan bastaǵan bolatyn.

«Jańa modýldik gospıtal bıyl 26 sáýirden 29 qarashaǵa deıin úzdiksiz jumys istegen bolatyn. Modýldik ǵımaratty dezınfektsııalyq óńdeýge jabý úshin biz jańa bólimshege kóship jatyrmyz», - dedi I.Jekenova atyndaǵy «Qalalyq klınıkalyq juqpaly aýrýlar aýrýhanasy» MKK bas dárigeriniń orynbasary Tamara Ýtaǵanova.

Onyń aıtýynsha, modýldik aýrýhanada 135 patsıent bolǵan. Olardyń keıbiri jaǵdaıynyń jaqsarýyna baılanysty shyǵaryldy. Keıbiri úı karantınine jiberildi.

«Medıtsınalyq qyzmetkerler 4 kúnde kóship ketti. 119 patsıent 30 qarashada bir kún ishinde aýystyryldy», - dedi ol.

Kóshý jumystary áli de jalǵasatyn bolady.

Bul protsedýra bastapqyda koronavırýstyń ekinshi tolqynyna daıyndyq retinde josparlanǵan bolatyn.

Modýldik gospıtal qalanyń densaýlyq saqtaý júıesiniń rezervinde bolady. Covid-19 dıagnozy qoıylǵan patsıentterdiń sany artqan jaǵdaıda aýrýhana iske qosylady.

Bas dárigerdiń orynbasary patsıentterdi sýyq túsken soń aýystyryp jatyr degen qaýesetke jaýap berdi.

«Patsıentter nege olaı degenin bilmeımin. Dálizde, palatalarda, kóshede termometrııa júrgizemiz. Іshtegi temperatýra turaqty 24 gradýsty kórsetip tur. Patsıentterdiń dene qyzýy 40-tan asyp tursa, tońýy múmkin. Alaıda, palatalar sýyq degen shaǵym túsken joq», - dedi ol.

Tamara Ýtaǵanova aýrýhananyń barlyq qural-jabdyqtary ornynda qalatynyn aıtty. Jańa aýrýhana zamanaýı qural-jabdyqpen tolyq qamtylǵan.

Ol jerde - 500 tósek oryn, jansaqtaý bóliminde 45 tósek oryn bar.

Jańa bólimshe Túrksib aýdanynda Degdar kóshesi 10/2 mekenjaıynda ornalasqan.

Tamara Ýtaǵanovanyń aıtýynsha, jańa aýrýhanada 20 medıtsınalyq qyzmetker vırýs juqtyrǵan.

Aıta ketý kerek, modýldik aýrýhana 24 sáýirde Alataý aýdanynda ashylǵan bolatyn.

Jalpy aýdany 5850 sharshy metr, 280 orynǵa arnalǵan ǵımaratty salýǵa 5 mlrd teńge qarajat jumsalǵan.