Almatyda 11 jastaǵy bala koronavırýstan emdelip jatyr
ALMATY. QazAqparat – Almatyda 11 jastaǵy baladan koronavırýs anyqtaldy, dep habarlaıdy QazAqparat tilshisi.
«Qazirgi ýaqytta Almatyda koronavırýs ınfektsııasyn juqtyrýdyń rastalǵan 73 jaǵdaıy tirkeldi, onyń jeteýi jazylǵan. Nátıjesinde búgingi kúni qalalyq juqpaly aýrýlar statsıonarlarynda COVID-19-dan em alyp jatqan 66 patsıent bar», - dedi Almaty qalasy Qoǵamdyq densaýlyq basqarmasynyń basshysy Tileýhan Ábildaev brıfıng barysynda.
Onyń aıtýynsha, jańadan anyqtalǵan alty adamnyń tórteýi baılanysta bolǵandar, bir patsıent 19 naýryzda Mınsk-Almaty reısimen jáne taǵy bireýi osy kúni Ystanbul-Almaty reısimen ushyp keldi.
«Emdeýge jatqyzylǵandardyń ishinde 11 jastaǵy bala bar, qazir ol qalalyq balalar juqpaly aýrýlar aýrýhanasynda ákesimen birge jatyr. Qazirgi kezde aýyryp jatqandardyń jaǵdaıy jaqsyrap keledi, 58 naýqasta – qanaǵattanarlyq, 1 eresek naýqasta – aýyr, 6 eresek adamda ortasha aýyrlyqta jáne 1 balada ortasha aýyrlyqta», - deıdi Tileýhan Ábildaev.
Provızorlyq ortalyqtarda 1 046 adam bar, onyń ishinde 102-si – bala. Almatydaǵy provızorlyq ortalyqtar kóbeıip, altaý boldy. Buǵan deıin 4 ortalyq bolǵan edi.
Karantındik oqshaýlaý úshin 3 shıpajaı jáne bir jataqhana bólindi.
Búgingi kúni 419 azamat karantınge oqshaýlanǵan. Bul - shetelden kelgender. Olardyń barlyǵy qaı elden kelgenine qaramastan, eki kúndik karantınge ornalastyrylýda. Kelgennen keıin olardan COVID-19-ǵa taldaý alynady. Nátıje teris bolǵan jaǵdaıda olar úıine jiberiledi.
