Almatyda 11 medıtsınalyq mekeme qalypty jumys rejımine aýysty
ALMATY. QazAqparat- Almatyda 11 medıtsınalyq mekeme qalypty jumys rejımine aýysty. Bul týraly onlaın brıfıng barysynda qalalyq qoǵamdyq densaýlyq basqarmasynyń basshysy Narıman Tabynbaev málim etti, dep habarlaıdy QazAqparat tilshisi.
Onyń aıtýynsha, Buqar Jyraý qalalyq balalar klınıkalyq aýrýhanasy, Jedel medıtsınalyq kómek kórsetý aýrýhanasy, Halyq Arena TsF, psıhıkalyq densaýlyq ortalyǵy, temir jol aýrýhanasy, Otan soǵysy múgedekterine arnalǵan respýblıkalyq klınıkalyq gospıtal, HBO, №1 perzenthana, qalalyq kardıologııalyq ortalyq, №1 qalalyq klınıkalyq aýrýhana, Qorǵanys mınıstrliginiń gospıtali qalypty rejımge aýysty.
«14 maýsymnan bastap Ortalyq qalalyq klınıkalyq aýrýhananyń kovıdtik statsıonarlaryn, qalalyq klınıkalyq juqpaly aýrýlar aýrýhanasynyń Baızaqov kóshesindegi fılıalyn jabý josparlanýda. Bul statsıonarlar qalypty jumys rejımine kóshetin bolady», - dedi Narıman Tabynbaev.
Sonymen qatar, ol barlyq emhanalar men aýrýhanalarǵa dezınfektsııa júrgiziletinin atap ótti.
«Qazirgi kezde ınfektsııalyq statsıonarlarda 1258 adam em alýda. Qalada barlyǵy 3640 tósek-oryn bar. Qalada epıdemıologııalyq ahýal turaqtansa, kovıdti naýqastardy Degdar qalalyq klınıkalyq juqpaly aýrýhanasyna, Saıaly men Terekti shaǵyn aýdandaryndaǵy modýldi statsıonarlarǵa jatqyzý josparda», - dedi ol
