Almatyda 105 jastaǵy ájeıge kúrdeli ota jasaldy
Emdeý mekemesiniń baspasóz qyzmetiniń málimetinshe, almatylyq Saıkúl Keıdarova 105 jasta.
El tarıhynda tutas bir dáýirdi kórgen qart áje jambas súıeginiń joǵarǵy bóligin syndyryp, №7 aýrýhanaǵa shuǵyl jetkizildi.
Dárigerlerdiń aıtýynsha, hırýrgııalyq operatsııasyz naýqas bul aýyrsynýdy kótere almaýy múmkin edi.
«1918 jyly týǵan patsıentti jan-jaqty teksergennen keıin ornynan jyljyǵan jambas súıeginiń jaryqshaqtanǵan synyǵyna ota jasaldy. Zamanaýı hırýrgııa kómegimen jabyq repozıtsııa, jambas súıektiń proksımaldy bóligin súıek synyǵyn bekitý, gamma ózegi sekildi protsedýralar oryndaldy. Patsıent operatsııadan keıin ekinshi kúni-aq tirek arbaǵa súıenip aıaǵyna turdy»,- deıdi polıtravma bólimshesiniń meńgerýshisi Ramazan Askerov.
Reanımatsııa bóliminiń meńgerýshisi Esenaı Espenbetov patsıenttiń ómiri úshin úlken jaýapkershilikti sezingenin jetkizdi.
«Jas ereksheligine baılanysty aǵzasy anestezııany qalaı qabyldaıtynyn ýaıymdadyq. Óz tarapymyzdan ájeniń óz aıaǵymen úıine oralýyna barlyq múmkindikti jasadyq. Aıta ketý kerek, jabyq jambas synyqtary - tirek-qımyl apparatynyń eń aýyr jaraqatynyń biri. Olar kóbine qatty aýyrsyný sındromymen, kóp qan joǵaltýmen birge júredi jáne shuǵyl aýrýhanaǵa jatqyzýdy qajet etedi. Jambastyń shamadan tys synýy bar egde jastaǵy adamdarǵa ýaqtyly medıtsınalyq kómek kórsetilmese, sońy qaıǵyly jaǵdaıǵa ákelýi múmkin»,- deıdi dáriger.
№ 7 qalalyq klınıkalyq aýrýhanasynyń baspasóz qyzmeti atap ótkendeı, Saıkúl áje otany jaqsy kóterdi, operatsııadan keıin jaqsy kóńil-kúıde bolyp, medıtsına qyzmetkerlerine batasyn berdi.
