Almatyda 103 jastaǵy keıýana sanaqtan ótti

ALMATY. QazAqparat - Baqylaý aralaý kezinde 103 jastaǵy keıýana sanaqtan ótti. Bul týraly Almaty qalasy boıynsha statıstıka departamenti málim etti, dep habarlaıdy QazAqparat tilshisi.

Sanaq aıaqtalǵannan keıin osy aptada ınstrýktor-baqylaýshylar ıntervıýerlermen birlese otyryp, árbir eseptik aımaqtaǵy turǵyn úılerdiń 10 paıyzyn qamtıtyn respondentterge saýalnama júrgizedi.

Bul kezeń 8 qarashaǵa deıin jalǵasady jáne 2021 jylǵy halyq sanaǵy kezinde halyqty tirkeýdiń tolyqtyǵyn jáne derekter sapasynyń durystyǵyn tekserý maqsatynda júzege asyrylady.

Bul shara sonymen qatar suhbatshylardyń árbir turǵyn úıge barǵanyn jáne saýalnamanyń barlyq turǵyndar úshin toltyrylǵanyna dálel bolady.

«Naýryzbaı aýdanyndaǵy baqylaý sapary kezinde «Shuǵyla» shaǵynaýdanynyń jeke sektorynda ınstrýktor-baqylaýshylar 10 adamnan turatyn kópbalaly otbasyn tirkedi. Otbasynyń eń úlkeni 103 jastaǵy áje jáne onyń 81 jastaǵy uly boldy. Aýdannyń eń úlken turǵyny 1918 jyly dúnıege kelgen. Suhbatshylar búkil otbasyn sanaqtan ótkizip, bizdiń qurmetti respondentterge uzaq jáne baqytty ómir tiledi»,- delingen habarlamada.

Sanaqtan www.sanaq.gov.kz sanaq saıty arqyly ótýge nemese qalanyń 1446 nómirine, uıaly telefonyńyzdan 88000800878 nómirine tegin qońyraý shalyp, sanaqtan ótpegenińizdi habarlaýǵa bolatynyn esterińizge salamyz.

Qandaı da bir sebeptermen sanaqtan ótpeı qalǵan turǵyndar bolsa Almaty qalasy boıynsha sanaq bóliminiń 8 [phone] telefonyna habarlasa alady.