Almatyda 102 nómirine bir kúnde 49 ret telefon shalǵan adam jaýapkershilikke tartyldy
ALMATY. QazAqparat - Almaty polıtsııasy 102 nómirine sebepsiz habarlasatyn adamdardy jaýapkershilikke tartyp jatyr, dep habarlaıdy QazAqparat tilshisi.
2017 jyldyń basynan beri 3,5 myń telefon qońyraý túsken. Atalǵan derekter boıynsha adamdar QR ÁqK 438-babynyń 1-bólimi boıynsha ákimshilik jaýapkershilkke tartylyp, 30 AEK shamasynda aıyppul salyndy.
1 mamyr kúni 8***7187579 abonenti 102 nómirine 49 ret qońyraý shalyp, biraz únsizdikten soń qoıa salǵan.
Jyl basynan beri Almaty 102 nómirine 350 myń ret qońyraý shalynǵan.
«Málimetterdi óńdeý ortalyǵynda bir táýlikte bir operator 250 habarlama qabyldaıdy. Túski 15:00 men 21:00 arasynda árbir 45 sekýnd saıyn habarlama túsedi. Barlyǵy 10 operator kezekpen jumys jasaıdy. Operatorlardyń jumysy vıdeobaqylaý arqyly qadaǵalanyp otyrady», - dedi qalalyq ІІD jedel basqarý ortalyǵynyń basshysy Andreı Kvashnın.
2013 jyly ortalyqta «Aeonix» qońyraýlardy qabyldaýdyń jańa júıesi ornatyldy. Júıe qońyraý shalýshylardy avtomatty túrde kezekke qoıady. Adamdar jeli bos bolmasa qaıta habarlasamyz degen oımen qońyraýdy úzip qaıtadan qońyraý shalyp jatady.
«Biraq, bul durys emes. Kezekti kútken jaǵdaıda ǵana sizge qyzmet kórsetiledi. Osyndaı túsinispeýshilikti boldyrmaý úshin «Siz polıtsııaǵa qońyraý shaldyńyz, jelide qalyńyz, Sizge mindetti túrde jaýap beredi» degen habarlama tirkeldi», - dedi A.Kvashnın.
