Almatyda 1000-ǵa jýyq bala ashyq sport alańdarynda tegin jattyǵady
ALMATY. QazAqparat - Almatyda 1000-ǵa jýyq bala ashyq sport alańdarynda tegin jattyǵady. Bul týraly óńirlik kommýnıkatsııalar qyzmetiniń baspasóz máslıhatynda qalalyq Sport basqarmasynyń basshysy Rústem Baıseıitov málim etti, dep habarlaıdy QazAqparat tilshisi.
Onyń aıtýynsha, megapolıste 2400-den astam ashyq sport alańdary bar. Bul kórsetkish jyl saıyn artyp keledi.
Almatyda ashyq sport alańdarynda ákimdik tegin jattyǵýdy uıymdastyrdy. «Eńbek» baǵdarlamasy aıasynda 42 jattyqtyrýshy bir myńǵa jýyq balaǵa sabaq beredi. Jattyqtyrýshylar sanyn taǵy da jıyrmaǵa ulǵaıtý josparda.
Sonymen qatar, «Jekpe-jek» sport túri alty aýdanda ashyldy. Onda balalar men jasóspirimder sport mektebiniń (BJSM) 14 jattyqtyrýshysy balalardy sportqa baýlýdy qolǵa aldy.
«Biz 61 mektepte sport aımaqtaryn jańǵyrtý jumystaryn jalǵastyrdyq. Fýtbol alańdaryn, voleıbol jáne basketbol alańdaryn, vorkaýt jáne júgirý joldaryn salý kózdelgen. Búginde Almaty mektepteriniń sport zaldarymen jáne sport jabdyqtarymen qamtamasyz etilý kórsetkishi 100% jáne elimizdegi eń úzdik bolyp tabylady», - dep habarlady Sport basqarmasynyń basshysy.
Balalar-jasóspirimder mektepterindegi sporttyq ınventardy modernızatsııalaý jáne taıaýdaǵy úsh jylda tolyqqandy jattyǵý protsesi úshin qolda bar ınfraqurylymdy jóndeý josparlanýda. Sonyń ishinde joǵary sport sheberligi mektebiniń ǵımaraty men Ortalyq stadıonnyń qosalqy alańyn jóndeletin bolady.
