Almatyda 100 jastaǵy ájeıge jańa jeke kýálik tabys etildi
ALMATY. QazAqparat- Almaty polıtsııasy 100 jastaǵy Qazaq KSR-iniń eńbek sińirgen óner qaıratkerine jańa jeke kýáligin tapsyrdy, dep habarlaıdy QazAqparat Polisia.kz. silteme jasap.
Kóshi-qon qyzmetkerleri jańa qujatty Marııa Ahmetovanyń úıine aparyp berdi.
«Sizdi 100 jasqa tolýyńyzǵa baılanysty berilgen jańa kýálikpen quttyqtaǵym keledi. Sizge uzaq ómir, densaýlyq, baqyt jáne amandyq tileımin», – dedi Kóshi-qon qyzmeti basqarmasynyń bólim bastyǵy Janna Jaqypbaeva.
Óz kezeginde ǵasyr jasaǵan qart ájeı polıtsııa qyzmetkerlerine alǵys aıtty.
«Men ishki ister organdarynyń jumysyna óte rızamyn. Polıtsııa qyzmetkerlerine rızashylyǵymdy bildiremin», – deıdi Márııa ájeı.
Márııa Ahmetova 1921 jyly 13 naýryz kúni Jambyl oblysy Shý aýdanynda dúnıege keldi. Qazaq KSR-iniń eńbek sińirgen óner qaıratkeri. Sh.Ýálıhanov atyndaǵy memlekettik syılyqtyń laýreaty. 1957 jyly Máskeýde ónertaný ǵylymdarynyń kandıdattyq dıssertatsııasyn qorǵaǵan birinshi qazaq áıeli.
