Almatyda «100 mektep, 100 aýrýhana» baǵdarlamasy aıasynda taǵy bir mektep ashyldy
/strong>Sáýirdiń 2-i. QazAqparat / Ádilet Musahaev / - Almaty qalasyndaǵy Túrksib aýdanynda «100 mektep, 100 aýrýhana» baǵdarlamasy aıasynda jalpy bilim beretin 4-shi jańa mektep ashyldy. Onyń ashylý rásimine Almaty qalasynyń ákimi Ahmetjan Esimov kelip, osy baǵdarlama boıynsha bıyl qalada 4 mektep salý isi josparlanǵanyn aıtty,
dep habarlaıdy QazAqparat.
«Buryn bul jerde 430 oryndy orys tilinde oqytatyn eski mektep bolǵan. 1200 oqýshyǵa arnalǵan jańa mektep, Elbasynyń «100 mektep, 100 aýrýhana» baǵdarlamasy aıasynda salynyp otyr. Qazaq, orys tilinde qatar bilim beretin bul mektep sońǵy úlgidegi talaptarǵa saı jabdyqtarmen qamtamasyz etilgen. Memleketimizdiń bolashaǵy, jastarǵa jaqsy tálim- tárbıe, sapaly bilim berýge bar jaǵdaı jasalǵan. Endigi kezekte, qurmetti oqytýshylar, deni saý, tereń oılaı biletin jastardy tárbıelep shyǵarý sizderdiń mindetterińiz», dedi qala ákimi.
Sondaı-aq A.Esimov mektepti aralap, ondaǵy sport zaldy, ashanany, kishi teatr men mýltımedııalyq ortalyqty jáne sońǵy úlgidegi ınteraktıvti taqtamen jabdyqtalǵan matematıka, fızıka, hımııa synyptaryn qarap shyqty. Mektepte jalpy 35 ınteraktıvti taqta qoıylǵan.
Qazirgi ýaqytta mektepte 710 oqýshy bilim alyp jatyr jáne 50 muǵalim jumys isteýde. Bul osy aýdandaǵy eń sońǵy úlgide salynǵan alǵashqy bilim oryny. Ony salýǵa memlekettik bıýdjetten 1 mıllıard 648 mıllıon teńge bólingen.
