Almatyda 100-den asa kásiporyn «Jıhaz jáne ınterer», «Sáýlet jáne dızaın» jáne «Aǵash jáne aǵash óńdeý» kórmesine qatysýda
;ALMATY. Maýsymnyń 9-y. QazAqparat /Názıra Eleýhan/ - Búgin Almatyda «Atakent» ortalyǵynda «Jıhaz jáne ınterer», «Sáýlet jáne dızaın» jáne «Aǵash jáne aǵash óńdeý» atty halyqaralyq qazaqstandyq kórme ashyldy,
dep habarlaıdy QazAqparat.
«Atakent-Ekspo» halyqaralyq kórme kompanııasy men QR Jıhaz jáne aǵash óńdeý kásiporyndar qaýymdastyǵynyń uıymdastyrýymen ótip jatqan kórmege alys jáne jaqyn 13 shet elden 100-den astam kásiporyndar men kompanııalar qatysýda. Kórmege jıhaz jáne aǵash óńdeý salasyndaǵy sońǵy zamanaýı tehnologııalar, ár túrli baǵyt pen stıldegi jıhazdar men materıaldar, ıntererdiń dekoratıvti zattary qoıylǵan.
Uıymdastyrýshylardyń aıtýynsha, bul kórme otandyq jıhaz óndirýshilerdiń syrtqy jáne ishki naryqta pozıtsııasyn nyǵaıtýǵa, iskerlik yntymaqtastyqtyń aıasyn keńeıtýge, ınvestıtsııa máselelerin sheshýge, sonymen qatar, jańa baılanystardy ornatýǵa yqpal beredi.
Shara barysynda jıhaz jáne aǵash óndirisi salasyndaǵy jetistikter men ozyq tehnologııalar jurtshylyq nazaryna kórsetilip qana qoımaı, osy saladaǵy ózekti máseleler talqylanyp, jıhaz óndirisin damytý, dızaındy jetildirý máseleleri keńinen sóz bolmaq.
Kórme maýsymnyń 12-sine deıin jalǵasady.
