Almatyda 10 myńǵa jýyq bala ońaltýdan ótti
ALMATY. QazAqparat- Almatyda balalardy táýlik boıy ońaltýdan ótkizetin 8 medıtsınalyq uıym bar. Eki kezeńdi ońaltý - neırohırýrgııalyq, nevrologııalyq, kardıologııalyq jáne travmatologııalyq beıinder boıynsha №2 qalalyq balalar klınıkalyq aýrýhanasynyń bazasynda, sonymen qatar, eki baǵyt: neırohırýrgııalyq jáne travmatologııalyq baǵyttar boıynsha júrgiziledi. 3 kezeńdi ońaltý bes memlekettik balalardy ońaltý ortalyǵynda jáne bir jekemenshik ortalyqta júrgiziledi. Bul týraly Almaty ákimdigi málim etti, dep habarlaıdy QazAqparat tilshisi.
Ońaltý ortalyqtarynda balalarmen kópsalaly top jumys isteıdi, onyń quramynda reabılıtolog, jattyǵý terapııasynyń nusqaýshysy nemese kınezıterapııa mamany, kásibı terapevt, massaj terapevti, psıholog, psıhoterapevt, logoped jáne t.b. ártúrli mamandar bar.
Ár balaǵa jeke ońaltý jospary jasalady. Buǵan qosa, beıimdelgen baǵdarlama boıynsha mektepke deıingi jáne mektep jasyndaǵy balalardyń tanym keńeıtý, este saqtaý men oılaýdy damytý, sonymen birge adamgershilik tárbıe berý maqsatynda sabaqtar toppen ótkiziledi. Bul jaǵdaıda balalardaǵy psıho-pedagogıkalyq patologııalar eskeriledi.«2023 jyldyń birinshi jartyjyldyǵynda Almatyda táýlik boıy ońaltý ortalyqtary men statsıonarlarda 5 626 bala ońaltýdan ótedi, onyń 606-y múmkindigi shekteýli. Budan basqa, memlekettik tapsyrys aıasynda balalarǵa ońaltý kómegi qala emhanalarynda da kórsetiledi. Ambýlatorııalyq deńgeıde jáne kúndizgi statsıonarlarda 4 131 bala ońaltýdan ótti»,- dedi shtattan tys bas balalar reabılıtology Elvıra Root.
Dárigerdiń aıtýynsha, múmkindigi shekteýli balalardyń ata-analarynyń nemese resmı ókilderiniń ortaq jaýapkershiligin damytý úshin medıtsına qyzmetkerleri turaqty negizde trenıngter, semınarlar ótkizedi.
«Ári ata-analarmen birge balalardy ońaltý jattyǵýlaryn úıretý sabaqtary únemi ótkizilip turady, osylaısha olar úıde de sabaqtaryn jalǵastyra alady. Balalardyń qasynda únemi júretin jandar da barlyq mamandyqty úırenedi. Al ata-analarǵa trenıngti psıhologtar ótkizedi»,- dep atap ótti maman.
