Almatyda 10 myń bala attraktsıondardy tegin paıdalandy
ALMATY. QazAqparat - Osy jazda turmysy tómen otbasynan shyqqan 10 myńǵa jýyq bala Ortalyq mádenıet jáne demalys saıabaǵyndaǵy attraktsıondardy tegin paıdalandy, dep habaralaıdy QazAqparat tilshisi.
Shilde aıynda ákimdik usynysyn saıabaq ákimshiligi qoldap, saıabaqta attraktsıondarǵa tegin kartochkalar berý týraly sheshim qabyldandy.
«Aktsııa bastalǵannan beri kartochkalardy 6 jastan 14 jasqa deıingi balalar paıdalandy. Olardyń ishindegi eń tanymal attraktsıondar «Tsepochka», «Koleso obozrenııa», «Orbıta» jáne «Veselye gorkı» boldy»,- dep habarlady ákimdikten.
Budan bólek, bir aı boıy balalarǵa saıabaqta balmuzdaq tegin taratyldy.
«Sonymen qatar, fýtbol, basketbol alańy, skeıt-park, rollerdrom, ústel tennısi jáne vorkaýt alańdary da tegin boldy. Balalar úshin ár senbi jáne jeksenbi kúnderi balalar qalashyǵynyń sahnasynda eki saǵattyq shoý-baǵdarlamalar kórsetiledi. Saıabaq ákimshiligi barlyq is-sharalardy ótkizýge ketetin shyǵyndardy ózderi kóterdi»,- dep atap ótti ákimdik ókilderi.
Bul aktsııa osy jyldyń tamyz aıynyń sońyna deıin ótedi.
Kartochkalardy alý úshin «Altyn Taraz» JShS keńsesine Gogol kóshesi, 1 mekenjaı boıynsha (OMDS aýmaǵynda) habarlasý qajet. Ózimen birge balanyń týý týraly kýáligi (kóshirmesi nemese elektrondy túrde) bolýy mindetti. Anyqtama telefony: +7 (705) 892-75-24.
