Almatyda 10 kitaphana tolyqtaı jańartyldy

ALMATY. QazAqparat - Almaty qalasynyń ákimi Baqytjan Saǵyntaev Instagram paraqshasynda kitaphanalar bazasynda balalar men jastarǵa paıdaly ortalyqtar qurý týraly aıtty, dep habarlaıdy QazAqparat tilshisi.

Qalada ákimniń tapsyrmasy boıynsha megapolıstiń kitaphana júıesin modernızatsııalaý jalǵasyp jatyr. Byltyrdan beri 10 kitaphana tolyqtaı jańartyldy.

«Qazir bul oryndar shań basqan kitap qoımasy emes, zamanaýı kitap úıine aınaldy. Altynsarın dańǵylyndaǵy 37-úıde ornalasqan Qazaqstandyq jazýshylar kitaphanasyna barǵanymda ákimdiktiń qoldaýymen shyǵarylǵan sóz sheberleriniń basylymy tanystyryldy. Jalpy taralymy 65 myń dana bolatyn 30 túrli kitap qalanyń barlyq kitaphanasyna taratyldy», - dep jazdy B. Saǵyntaev.

Sondaı-aq qala ákimi Alataý aýdanyndaǵy jańartylǵan №44, Túrksibtegi №26 men №1 kitaphanalarda boldy.

«Kitap saqtaýdyń zamanaýı júıesi ondaǵy bos aımaqty tıimdi paıdalanýǵa, ıaǵnı shyǵarmashylyq, sheberlik sabaqtaryna, otbasylyq oqý saǵattaryn ótkizýge oryn bólýge múmkindik beredi. Biz kitaphanalardyń jumys ýaqytyn barynsha uzartyp, demalyssyz qyzmet kórsetýine tyrystyq. Kitaphananyń barynsha qoljetimdi ári kelýshi úshin qyzyqty bolýyna mán berdik», - dedi ákim.

Osy maqsatta tanymal jáne jas jazýshylarmen kezdesýler, shyǵarmashylyq keshter men taqyryptyq úıirmeler ótkiziledi.

«Jańǵyrtýdan keıin oqyrmandar sany 25%-ǵa, keı jerde 50%-ǵa kóbeıdi. Ásirese, onyń kóbi balalar ekeni qýantady», - dep atap ótti B. Saǵyntaev.