Almatyda 10 balaly otbasyn jaldamaly páterden qýyp shyqty
ALMATY. QazAqparat - Almatyda páter jaldap turyp jatqan 10 balasy bar otbasyn úı ıesi kóshege qýyp shyqty, dep habarlaıdy «QazAqparat» HAA.
«Otbasy osydan eki apta buryn úıdi jalǵa alǵany úshin tólenýi tıis qarjynyń belgili bir bóligi aldyn ala tólegen. Jańa páterge olar mektepke jaqyn turý úshin kóship kelmek bolǵan jáne jaldamaly páterge búgin kelýi tıis edi. Úıdi jalǵa alý týraly kelisim de búgin jasalýy tıis edi. Otbasy búkil zattaryn alyp kelgende úı ıesi bir aıdyń jalǵa alý qunyn tolyq tóleýdi talap etken. Al kelisimshartty erteń alyp kelemin dep ýáde bergen. Biz mol kólemdegi qarjyny kelisimshartsyz tóleýden bas tartyq. Al úı ıesi bizdi qýyp shyqty»,-dep habarlady Facebook paraqshasynda kópbalaly Almaty turǵyny Janna Kım.
Oqıǵanyń mán-jaıyn anyqtaý úshin áıeldi balalarymen birge Bostandyq aýdandyq ishki ister bólimine alyp kelgen.
Tergeý júrgizilgennen keıin úı ıesi aldyn ala alǵan qarjysyn otbasyna qaıtardy. Polıtsııa qyzmetkerleri úıdi jalǵa berip otyrǵan adamnyń salyq tóleýden jaltarý faktisi boıynsha tekseriletinin aıtty.
Erli-zaıypty Edýard jáne Janna Kım birneshe jyldan beri ata-anasy joq balalardy asyrap keledi. Úsh balany dúnıege ákelgen soń olar balalar úıinen de bala asyrap alýdy jón kórgen. Osylaısha, olardyń otbasynda taǵy 7 ul men qyz paıda bolǵan. Erli-zaıyptylar sonymen qatar jetim-jesir jáne erekshe jaǵdaıda qajet etetin balalarǵa kómektesetin «Reach» qoǵamdyq qorynda qyzmet etedi.
