Almatyda 1 jyl ishinde ata-analardan májbúrli túrde aqsha jınaǵan 10 mektep dırektory jazalandy
ALMATY. QazAqparat - Almatyda 1 jyl ishinde ata-analardan májbúrli túrde aqsha jınaǵan 10 mektep dırektory jazalandy. Bul týraly búgin qalalyq bilim berý basqarmasy ótkizgen baspasóz máslıhaty barysynda belgili boldy.
Basqarma basshysynyń orynbasary Galına Samotokına ata-analardan jóndeýge, qosymsha oqýlyqtarǵa, mektep qajettilikterine májbúrlep qarjy jınaýdyń zańsyz ekendigin jetkizdi. Bir jyl ishinde osyndaı áreketi úshin 10 mektep dırektory jazalanǵan.
«Bul másele basqarmanyń qatań baqylaýynda tur. Osy jaqynda ǵana barlyq mektepterge hat jiberdik. Oqýshylar men ata-analardan eshqandaı aqsha almaý týraly. Qazir basqarmada arnaıy senim telefondary jumys istep tur. 272-11-02 nómirine habarlasyp, zańsyzdyq týraly habarlaı alasyzdar. Habarlasqan adamdardyń aqparaty keı jaǵdaıda rastalyp jatyr. Byltyrǵy oqý jylynda 10 mektep dırektory tıisti jazasyn aldy. Olardan bul soma óndirilip alyndy. Tipti qyzmetinen qýylǵandar da bar», - dedi basqarma basshysynyń orynbasary Galına Samotokına.
Basqarma basshysy Rahat Shımasheva qarjy jınaý bastamasyn ata-analardyń ózderi de jıi kóteretinin aıtyp qaldy.
«Ata-analar erikti túrde demeýshilik qarjy jınaı alady. Oǵan qaqylary bar. Biraq, kóbine kóptegen ata-analar ózderi bastama kóterip, balalardy kınoǵa, teatrǵa aparaıyq, týǵan kúnin atap óteıik dep shý jasap jatady. Bul durys emes. Senbi kúni biz mektep basshylaryn jınap úlken jıyn ótkizemiz. Sonda osy másele eń birinshi aldymen talqylanady», - dedi Rahat Shımasheva.
