Almatyda 1 shildeden bastap halyqqa qyzmet kórsetý ortalyǵynda neke qıdyrýǵa bolady
ALMATY. QazAqparat - 1 shildeden bastap Azamattyq hal aktilerin tirkeý (AHAT) bólimderiniń fýnktsııalary «Azamattarǵa arnalǵan úkimet» Memlekettik korporatsııasy» kommertsııalyq emes aktsınerlik qoǵamyna beriledi.
Bul týraly óńirlik kommýnıkatsııalar qyzmetiniń alańynda ótken baspasóz máslıhatynda Almaty qalasy Ádilet departamentiniń ókilderi aıtty, dep habarlaıdy QazAqparat tilshisi.
Almaty qalalyq Ádilet departamentiniń tirkeý qyzmeti salasyndaǵy baqylaý bólimi basshysynyń mindetin atqarýshy Janar Beısenovanyń sózinshe, HQKO-da azamattyq hal aktilerin tirkeýge baılanysty memlekettik qyzmetterdiń barlyq túrleri kórsetiletin bolady.
«Osylaısha, azamattardyń barlyq memlekettik qyzmetterdi bir jerden «bir tereze» qaǵıdaty boıynsha alý maqsatynda barlyq halyqqa qyzmet kórsetý ortalyqtary biryńǵaı júıege biriktirilgen», - dedi departament ókili.
Sondaı-aq, ol kórsetiletin memlekettik qyzmetterge toqtaldy.
«Kórsetiletin memlekettik qyzmetterge birqatar fýnktsııa jatady. Atap aıtar bolsaq, neke qııý jáne buzýdy, ólimdi memlekettik tirkeý, akt jazbalaryna ózgerister, tolyqtyrýlar, túzetýler engizý, onyń ishinde atyn, ákesiniń atyn, tegin ózgertý, ákelikti (anasy ekenin) anyqtaý, bala asyrap alý bar. Sonymen qatar azamattyq hal aktileriniń jazbalaryn qalpyna keltirý jáne joıý, bastapqy jáne qaıtalama kýálikterdi, anyqtamalardy elektrondyq nusqada nemese qaǵaz túrinde berý»,- dep túsindirdi Janar Beısenova.
Ádilet departamentiniń tirkeý qyzmeti salasyndaǵy baqylaý bóliminiń jetekshi mamany Sara Murzıeva jeke ómir, jeke jáne otbasylyq qupııa zańmen qorǵalatynyn atap ótti.
Sondaı-aq azamattardyń jeke jáne otbasylyq ómiri týraly málimetterdi jarııa etkeni úshin jaýapkershilik bar ekenin eske saldy.
«Tirkeýshi organdardyń qyzmetkerleri asyrap alýshynyń kelisiminsiz asyrap alý týraly qandaı da bir málimetterdi habarlaýǵa jáne asyrap alýshylardyń asyrap alynǵan balanyń ata-anasy bolyp tabylmaıtyndyǵy týraly aqparatty qamtıtyn qujattardy berýge quqy joq. Bul másele qatań baqylaýda», - dep qorytyndylady Sara Murzıeva.
