Almatyda 1-shi toptaǵy múgedek jandardy qala ishinde tasymaldaýǵa jańa 3 avtokólik tabystaldy

MATY. 26 shilde. QazAqparat /Ádilet Musahaev/ - Almatyda búgin «Sábı» qaıyrymdylyq qory Almaty qalasynyń múgedekter uıymyna 3 arnaıy jabdyqtalǵan «Inva taksı» shaǵyn avtobýsyn saltanatty túrde syılady.

Bul avtobýstar «Almaty GazInjınırıng» kompanııasynyń demeýshiligimen alynǵan.

Arnaıy jabdyqtalǵan bul avtobýstar arbaǵa tanylǵan jandardy ǵana emes, barlyq 1-shi toptaǵy múgedek adamdardy qalanyń kez-kelgen jerine tegin jetkizip otyrady.

"Múgedek jandardyń ózderin qoǵamdaǵy barlyq adamdardaı sezinýine jáne qoǵamdyq jumystarǵa aralasýyna jaǵdaı jasaý kerek. Ókinishke qaraı, mundaı qadamdar bizdiń elde endi ǵana jasalyp jatyr. Bizdiń bastamamyzdy múmkindigi bar elimizdiń basqa da kompanııalary men uıymdary jalǵastyryp áketse nur ústine nur bolar edi", - deıdi «Almaty GazInjınırıng» kompanııasynyń dırektory Tatıana Perehova.

Jıynǵa qalalyq múgedek balalardyń ata-analary qaýymdastyǵynyń, qalalyq múgedekter qoǵamy jáne taǵy basqa uıymdardyń ókilderi qatysyp, múgedek balalardyń kontserttik baǵdarlamasyn tamashalady. Balalar ózderi shyǵarǵan óleńderin oqyp, teatrlandyrylǵan qoıylymdaryn usynyp, bı bılep saltanatty jıynnyń kórkin qyzdyra tústi.

Alaıda ózge toptaǵy múgedektigi bar balalardyń ata-analary mundaı járdemnen balalarynyń tysqary qalǵandaryna narazylyqtaryn baıqatty. «Meniń balam - ekinshi toptaǵy múgedek. Oǵan qoǵamdyq kólikterde júrýge jeńildik jasalǵan, alaıda qalalyq avtobýstarda saý adamnyń ózi áreń júredi, sondyqtan mundaı avtokólikpen basqa da toptyń múgedekterin qamtysa eken», - deıdi Gúljan Samarhanova.