Almatyda 1 mln teńgeniń shulyqtary órteldi
ALMATY. QazAqparat - Almaty qalalyq Ádilet departamentiniń qyzmetkerleri zańsyz aınalymda júrgen kontrafaktilik ónimderdi joıýǵa kiristi, dep habarlaıdy QazAqparat tilshisi.
Búgin arnaıy jabdyqtalǵan peshte «LIMAX» markali shulyqtardyń 448 oramy órteldi.
«Kontrafakt zattar arnaıy peshte órteldi. Bul pesh atmosferaǵa zııandy zat bólmeıdi. Osylaısha qorshaǵan ortaǵa zııan keltirmeıdi. Bul shara arnaıy komıssııanyń qatysýymen júzege asty. Sot sheshimimen tárkilengen shulyqtar órteýden basqa maqsatta paıdalanýǵa jaramsyz sanalǵan. Kontrafakt dereginiń joly kesilgeli beri qoǵamdyq pikir nazardan tys qalǵan joq. Muqtaj adamdarǵa taratý týraly da pikir boldy. Alaıda qaıda qalaı shyǵarylǵany belgisiz zatty adamdardyń densaýlyǵyna nuqsan keltirmes úshin sot bul zattardy órtep jiberý týraly sheshim shyqty», - dedi Ádilet departamentiniń resmı ókili Ásemgúl Baqtygereeva.
Qazaqstan naryǵynda «LIMAX» brendiniń shulyqtary keń taraǵan. Sondyqtan atalǵan brendtiń shulyqtary qoldan jasalady. Bul taýar belgisiniń Qazaqstan boıynsha quqyqtyq ıesi «Taıbaǵarova» JK bolyp tabylady.
Jeke kásipkerlik Qazaqstan naryǵyndaǵy qoldan jasalǵan «LIMAX» ónimderin tekserýdi ótingen bolatyn.
«Tekserý barysynda «LIMAX» taýar belgisiniń qoldan jasalǵan ónimderiniń zańsyz aınalymy bar ekendigi anyqtaldy. Zańsyz aınalymnan somasy 1 031 550 teńge bolatyn 448 oram shulyq tárkilendi. Aıypty tulǵalar ákimshilik jaýapkershilikke tartyldy. Sonymen qatar, sapasyz sıntetıkalyq mata túrli teri aýrýlaryna ákeletinin aıtqymyz keledi. Taýar satyp alar kezde óndirýshiniń sıpattamasyna mindetti túrde nazar aýdarý kerek», - dedi qalalyq Ádilet Departamentiniń zııatkerlik menshik bólimi basshysynyń mindetin atqarýshy Ardaq Aıdarhan.
