Almatyda 1 mıllıon 371 myń aǵash bar
ALMATY. 25 maýsym. QazAqparat - Keıbireýler bizdi bıýdjet qarjysyna erikkennen aǵash kesip júr dep oılap júrgen sııaqty. Ony qala ákimi Ahmetjan Esimov búgin buqaralyq aqparat quraldary ókilderimen kezdesken kezde aıtty.
«Almatyda 20 jyl boıy eski aǵashtardy kesý jumysy júrgizilgen joq. Byltyr qatty boran kezinde ǵımaratqa, kólikke jáne taǵy basqa jerlerge 70-ke jýyq aǵash qulap, jyl sońynda onyń sany 100-den asty. Al bıyl 5 aıdaǵy qulaǵan aǵashtar 20-ny qurap otyr. Jalpy qaladaǵy kesiletin eski jáne aýrý aǵashtardyń sany 40 myń bolatyn. Osy ýaqytqa deıin onyń 22 myńy joıyldy. Bıyl jáne kelesi jyly endi qalǵan 18 myńy kesiledi», - dedi A. Esimov. Qala ákiminiń aıtýynsha, olardyń ornyna 3 jylda jalpy sany 59 myń aǵash otyrǵyzý josparlanyp otyr. Olar qazirgi zamanǵy qalalyq úlgidegi aǵashtar. Japyraǵy az jáne jyl boıy kóbirek kógerip turady. Ony otyrǵyzý jergilikti bıýdjet esebinen jáne uıymdardan ótemaqy retinde otyrǵyzady, sondaı-aq kásiporyndar men jeke tulǵalar esebinen júzege asyrylýda. Jalpy kópir, aınalma jol salý jáne taǵy basqa da jańa qurylys jumysy kezinde májbúrlikten kesiletin aǵashtardyń ár túbine ótemaqy retinde uıymdarǵa 2 aǵash otyrǵyzý mindettelgen.
