Almatyda 1 qańtar men 27 naýryz aralyǵynda 15 myńǵa jýyq adam KVI juqtyrǵan - ákim

ALMATY. QazAqparat – Almaty qalasynyń ákimi Baqytjan Saǵyntaev «Almaty» telearnasyndaǵy Akimat Live tikeleı efırinde koronavırýske qatysty jaǵdaıdyń ýshyǵyp bara jatqanyn málimdedi jáne qala turǵyndaryn karantın talaptaryn qatań saqtaýǵa shaqyrdy, dep habarlaıdy QazAqparat tilshisi.

Baqytjan Saǵyntaevtyń aıtýynsha, koronavırýs boıynsha epıdemıologııalyq ahýal órship barady. 10 naýryzdan bastap Almaty «qyzyl» aımaqta. Іndet bastalǵaly beri koronavırýs ınfektsııasyn juqtyrǵan 32 597 naýqas tirkeldi (halyqtyń 100 myńyna shaqqandaǵy kórsetkish 1602,0 quraıdy). 1 qańtar men 27 naýryz aralyǵynda 14 856, 2020 jyly qaýipti indetti juqtyrǵan 18521 naýqas tirkelgen.

20-27 naýryz aralyǵynda 3169 naýqas tirkeldi. Turǵyndar arasyndaǵy vırýs juqtyrý deńgeıi tómendemeı tur. Jaǵdaıdy almatylyqtardan anyqtalǵan vırýstyń jańa shtamdary da qıyndatýda.

«Bıylǵy jyldyń naýryz aıynda syrqattaný táýligine 132 jaǵdaıdan kúrt ósýi baıqaldy, naýryz aıynyń úshinshi aptasynda táýligine ortasha eseppen 355 jaǵdaıǵa jetti, qazirgi ýaqytta táýligine 450-500 jaǵdaı, bir mezgilde ósýimen táýligine 8000-ǵa deıin júrgizilgen PTR analızderiniń sany, onyń ishinde jeke zerthanalarda 4500-ge deıin ósti»,- deıdi ákim.

Infektsııanyń negizgi oryndary KVI ınfektsııasynyń barlyq jaǵdaılarynyń shamamen 42% bolatyn saýda jáne tamaqtandyrý kásiporyndary bolyp qalatyndyqtan, tıisti sharalar qabyldandy. Osyǵan baılanysty karantın talaptary eki ret kúsheıtildi. Ol 20-29 naýryz aralyǵynda.

«Barsha turǵyndardy karantın talaptaryn qatań saqtaýǵa, betperde kııýge, áleýmettik araqashyqtyqty saqtaýǵa jáne kópshilik sharalar ótkizýden, adam kóp shoǵyrlanǵan jerge barýdan aýlaq bolýǵa shaqyramyn», - dedi B. Saǵyntaev.