Almatyda №1 qalalyq klınıkalyq aýrýhana josparly emdeýdi qaıta bastady

ALMATY. QazAqparat - Smart Health University City senimgerlik basqarýyndaǵy Almaty qalasynyń №1 qalalyq klınıkalyq aýrýhanasy josparly emdeýdi qaıta bastady. Medıtsınalyq mekeme bir jyldan astam ýaqyt boıy koronavırýs ınfektsııasyna shaldyqqan naýqastardy emdeıtin ınfektsııalyq aýrýhana retinde jumys istedi. Bul týraly QazAqparat tilshisine atalǵan aýrýhananyń basqarma tóraǵasy Ernest Qalıev aıtty.

Ernest Qalıevtiń sózinshe, búkil álem úshin koronavırýs indettiń órshýi aýyr synaqqa aınaldy.

«2020 jyldyń naýryz aıynan bastap medıtsınalyq mekeme koronavırýstyń taralýyn boldyrmaýǵa belsendi túrde atsalysty. Osy ýaqytta naýqastardy josparly jáne shuǵyl gospıtalızatsııalaý toqtatyldy. Koronavırýs belgileri bar naýqastardy emdeý úshin ýaqytsha tósek-oryndar ornalastyryldy. Al 2021 jyldyń qarashasynan bastap aýrýhana josparly emdeýdi qaıta jandandyrdy. Medıtsınalyq qyzmetterdiń sapasy men deńgeıin arttyrý maqsatynda klınıkadaǵy bólimshelerge kúrdeli jóndeý jumystary júrgizildi. Jeltoqsan aıynda aýrýhanaǵa jańa kompıýterlik tomografııa apparaty jetkiziledi», - deıdi ol.

Onyń aıtýynsha, 2020 jyldan bastap tapsyrmany oryndaý maqsatynda jeke qorǵanystyń medıtsınalyq quraldary- bir rettik qolǵaptar, dezınfektsııalyq quraldar, dári-dármek jáne medıtsınalyq maqsattaǵy buıymdar (ottegi kontsentratorlary, pýlseıksımetrler, ylǵaldandyrylǵan ottegi berý qurylǵylary) jáne jańa tsıfrlyq rentgen apparaty satyp alyndy.

«2021 jyly 5 ókpeni jasandy jeldetý jáne 40 HiFlow apparaty satyp alyndy, reanımatsııa bólimi 12 tósekke deıin keńeıtildi. Patsıentterge arnalǵan jańa matratstar satyp alyndy, emdelýshilerge arnalǵan 420 shaqyrý túımesi ornatyldy, medıtsınalyq qyzmetkerlerge arnalǵan elektrondy dıspleı ornatyldy. Basqarýshy kompanııa bul maqsattarǵa 200 mln teńgeden astam ınvestıtsııa saldy», - deıdi Ernest Qalıev.

Qazir aýrýhanada allergologııa, pýlmonologııa, nevrologııa bólimderi ashyldy.

Sonymen qatar, kardıologııa, kópsalaly terapııa, gastroenterologııa, kardıologııalyq ońaltý, fızıoterapııa, kópsalaly hırýrgııa bólimderi óz jumysyn qaıta bastady.