Almatyda 1-5 synyp oqýshylaryna arnalǵan 1,2 myń kezekshi top bar

Bilim basqarmasynyń málimetine sáıkes, qalada 270 myńnan astam oqýshyny qamtıtyn 207 memlekettik mektep jáne 17 myńnan astam oqýshyǵa arnalǵan 69 jekemenshik mektep bar.

Epıdemıologııalyq jaǵdaıǵa baılanysty balalardyń jáne muǵalimderdiń densaýlyǵy men qaýipsizdigin saqtaý maqsatynda qaladaǵy 205 memlekettik mektepte oqý jyly qashyqtan oqý formatynda bastaldy.

«Kólsaı» jáne «Sulýsaı» yqshamaýdanynda ornalasqan № 194 jáne197 jalpy bilim beretin mektepter oqýshy sanynyń az bolýyna baılanysty oqý jylyn shtattyq rejımde bastady.

Oqýdyń 1-toqsany aıaqtalyp, 2-toqsannyń eki aptasy ótti, oqý protsesi josparly túrde bastalyp, júıeli jáne birqalypty júrýde.

Qazirgi ýaqytta mektep oqýshylarynyń 94% qashyqtan oqyp jatyr. Qashyqtan oqytýdy sapaly uıymdastyrý úshin Bilim jáne ǵylym mınıstrliginiń №345 buıryqpen bekitilgen «Ádistemelik usynymdaryn» basshylyqqa ala otyryp, birqatar jumys atqarylýda.

«Birinshiden, oqýshylar kompıýterlik tehnıkamen 100% qamtamasyz etildi. Ekinshiden, bilim basqarmasy tsıfrlandyrý basqarmasymen jáne aýdandyq ákimdiktermen birlesip ınternet jyldamdyǵy tómen 169 jerde qosymsha mobıldi bazalyq stansa ornatty. Sondaı-aq, ınternetke qosylýdy qajet etetin 30 myńnan astam oqýshyǵa SIM kartalar taratyldy. Úshinshiden, oqý protsesin qashyqtan uıymdastyrý úshin mektep ınternet-platformany tańdady» dep habarlady qalalyq bilim basqarmasynyń baspasóz qyzmeti.

Oqý jyly bastalar aldynda Almaty qalasynyń bilim basqarmasy 15 myńnan astam muǵalimge qashyqtan oqytý platformalaryn qoldaný boıynsha trenıng ótkizdi.

«Bekitilgen keste boıynsha qashyqtan oqytýdyń sapasy men qol jetimdiligin turaqty baqylaýdy qamtamasyz etý úshin qalalyq ádistemelik kabınettiń ádiskerleri muǵalimderge ádistemelik kómek kórsetý maqsatynda onlaın rejıminde sabaqqa qatysyp otyrady. Qalalyq ǵylymı-ádistemelik ortalyq Bilim jáne ǵylym mınıstrliginiń buıryǵymen bekitilgen ádistemelik usynymdardy basshylyqqa ala otyryp, qalada qashyqtyqtan oqytý týraly nusqaýlyq, erejeler daıyndap, bilim berý uıymdaryna jiberdi. Osy erejege sáıkes ár mektepte erejeler jasaldy. Bilim berý mekemelerinde qashyqtan oqytý tehnologııalaryn qoldana otyryp, oqý protsesin ádistemelik jáne tsıfrlyq qoldaý boıynsha is-sharalar jospary ázirlendi» dep atap ótti basqarmadan.

Ár muǵalimniń ýaqytyn únemdeý maqsatynda qalada 277 muǵalimnen turatyn arnaıy top quryldy, olar ár pán boıynsha 1-11 synyptarǵa tezıster jasady.

Sonymen qatar, №159 gımnazııa bazasynda bastaýysh mektep úshin telesabaqtar túsirilip jatyr. Búgingi kúni 1 000-nan astam sabaq túsirildi, olar «Balapan» (qazaq tilinde), «El arna» (orys tilinde) telearnalarynda kórsetiledi.

«Oqý jylynyń basynan bastap ata-analar ótinishin únemi qadaǵalap otyrý úshin bilim basqarmasy jáne barlyq aýdandyq bilim bólimderi oqýshylardyń ata-analarymen oqý úderisin uıymdastyrýdyń barlyq máseleleri boıynsha aqparattyq-túsindirý jumystaryn júrgizedi.

Sonymen qatar, qalanyń 145 (70%) mektebinde 15488 balany qamtyǵan 1-shi men 5 synyptar úshin syıymdylyǵy 15 adamnan aspaıtyn, 1 211kezekshi synyp uıymdastyryldy. Kezekshi synyptardyń qyzmeti sanıtarlyq epıdemıologııalyq talaptardy qatań saqtaı otyryp júzege asyrylady.

Kezekshi synypta oqýǵa sozylmaly aýrýlary joq balalar jiberiledi. Kezekshi synyptarda balalardyń oqýyn tańdaý quqyǵy balalardyń ata-analaryna nemese zańdy ókilderine tıesili.

Kezekshi synyptardyń jumys isteýine qoıylatyn talaptar:

1) synyptyń tolymdylyǵy – 15 baladan artyq emes;

2) sabaqtyń uzaqtyǵy – 40 mınýt;

3) mektepke kirý kezinde bilim alýshylardyń temperatýrasyn kúndelikti ólsheý;

4) úzilister ártúrli synyptar úshin ár ýaqytta;

5) maska rejımin qamtamasyz etý;

6) áleýmettik alshaqtyqty saqtaý, partalardy 1,5-2 metr qashyqtyqta ornalastyrý;

7) ár sabaqtan keıin kabınetterdi jeldetý, kvartstaý;

8) ár sabaqtan keıin qoldy jýý jáne arnaıy quraldardy qoldaný;

Qoǵamdyq densaýlyq saqtaý departamenti kúndelikti mektep oqýshylarynyń COVID-19 aýyrǵan týraly taldaýdy júrgizip otyrady.