Almatyda 1,5 myń medıtsına qyzmetkerinen kadr rezervi jasaqtaldy
ALMATY. QazAqparat - Almatyda 1,5 myń medıtsına qyzmetkerinen turatyn kadr rezervi jasaqtaldy. Bul týraly qalalyq qoǵamdyq densaýlyq basqarmasynyń basshysy Kamaljan Nadyrov aıtty, dep habarlaıdy QazAqparat tilshisi.
Onyń aıtýynsha, qazir dárigerlerdi, orta jáne kishi medıtsına qyzmetkerlerin qosa alǵanda, 4 464 qyzmetker koronavırýsqa qarsy tynbaı jumys isteýde.
«Biz 1 526 qyzmetkerden kadr rezervin qalyptastyrdyq, onyń ishinde dárigerler, orta jáne kishi medıtsına qyzmetkeri bar. Biraq, qosymsha tósek-oryn ashý arqyly biz qolda bar rezervti turaqty túrde jumyldyrýǵa májbúrmiz. Qalada kadr rezervin jasaǵanymyzǵa qaramastan, terapevt, pýlmonolog, anestezıolog, reanımatolog jáne ınfektsıonıst sııaqty mamandar tapshylyǵy baıqalady. Osyǵan baılanysty biz statsıonarda jumys isteý úshin medıtsına qyzmetkerlerin qabyldaýdy jalǵastyramyz. Tólem jáne jumys sharttary týraly konsýltatsııany +7 (702) 633-01-68 telefony arqyly alýǵa bolady», - dedi Kamaljan Nadyrov.
Medıtsına qyzmetkerleri úshin biliktilik arttyrý onlaın-kýrstary udaıy ótkizilip turady.
Koronavırýspen kúreske jumyldyrylǵan barlyq medıtsına qyzmetkerleri arnaıy oqytýdan ótken.
