Almatyda 1-2 naýryzda Ó.Joldasbekovtyń 80 jyldyq mereıtoıyna oraı І halyqaralyq Joldasbekov sımpozıýmy ótedi

Sımpozıýmnyń uıymdastyrýshylary - QR Bilim jáne ǵylym mınıstri, Ál-Farabı atyndaǵy Qazaq ulttyq ýnıversıteti jáne Ulttyq ınjenerlik akademııasy.

Sımpozıým jumysyna QR Parlamentiniń depýtattary, mınıstrliktiń ókilderi, qoǵam qaıratkerleri, BAQ ókilderi, JOO rektorlary qatysady. Olardyń kópshiligi ár jyldardaǵy ulttyq ýnıversıtet túlekteri. Sımpozıýmǵa Reseı, Italııa, Germanııa, AQSh, Japonııa, Úndistan, Ýkraına, Qyrǵyzstan, Belarýs jáne Ózbekstannan ǵalymdar shaqyrylǵan.

Uıymdastyrý komıtetiniń tóraǵasy, Ál-Farabı atyndaǵy QazUÝ-dyń rektory Ǵalymqaıyr Mutanovtyń aıtýynsha, sımpozıým baǵdarlamasyna ýnıversıtet alańynan kórnekti ǵalym, akademık, qoǵam jáne memleket qaıratkeri Ó.Joldasbekovke arnalǵan eskertkishtiń saltanatty ashylýy engizilgen. Sonymen qatar, sektsııa májilisterinde ǵalymdar Ó.A.Joldasbekovtiń ǵylymı muralaryn talqylaıdy.

Atalǵan shara aıasynda oqýshylar arasynda QazUÝ men «Daryn» ortalyǵynyń uıtqy bolýymen ǵylymı baıqaý ótedi. Sondaı-aq Ó.Joldasbekov eńbekteri jınaǵynyń jáne akademık týraly derekti fılmniń tusaýkeseri ótedi.

Ómirbek Aryslanuly Joldasbekov M.Lomonosov atyndaǵy MMÝ mehanıka-matematıka fakýltetiniń túlegi. Eńbek jolyn Shymkent tehnologııalyq ýnıversıtetinde oqytýshylyq qyzmetten bastady. Máskeýden aspırantýrany támamdaǵannan keıin ǵylymı dáreje aldy. Kóp jyldar boıy Qazaqstannyń jetekshi joǵary oqý ornyn basqardy. Joǵary bilikti kadrlar men ǵylymı mamandar daıyndaýda, ınfraqurylymdy jáne ýnıversıtettiń materıaldy-tehnıkalyq bazasyn damytýda eleýli jumystar atqardy. QR Májilis depýtaty, halyq tańdaýlysy bolǵan ýaqytta bilim jáne ǵylym júıesinde máselelerdi sheshýge belsendi úles qosty.

Ó.Joldasbekov qazaqstandyq mehanıkalyq robot qurastyrý, mashına jáne mashına jasaý mektebin qalyptastyrýshy. Ol 400-den asa ǵylymı eńbektiń avtory. Onyń 70-i shet tilderine aýdarylyp basylǵan.