Almatyda 1,2 mln-ǵa jýyq adam daýys berýge quqyly

ALMATY. QazAqparat- Almatyda 1,2 mln-ǵa jýyq adam daýys berýge quqyly. Bul týraly Óńirlik kommýnıkatsııalar qyzmetiniń baspasóz brıfınginde aýmaqtyq saılaý komıssııasynyń tóraǵasy Janna Asanova málim etti, dep habarlaıdy QazAqparat tilshisi.

«Bizdiń saılaýshylar tizimi turaqty tirkeý qaǵıdasy boıynsha jasalǵan. Ákimdikter saılaýshylar tizimin tapsyrǵan kezde Almaty qalasynda saılaýshylar sany 1 mıllıon 170 myńnan asty. Saılaý ýchaskelerine barlyǵy 11 myńnan astam esepten shyǵarý kýálikteri tapsyryldy», - dedi Almaty qalalyq aýmaqtyq saılaý komıssııasynyń tóraıymy Janna Asanova.

Sonymen qatar, ol esepten shyǵarý kýáligi ne úshin kerektigin túsindirdi.

«Shartty túrde men Almatyda tirkelgenmin, daýys berý kúni Tarazda bolýdy josparlap otyrmyn. Mundaı jaǵdaıda men óz ýchaskeme baryp, daýys berý quqyǵyn paıdalaný úshin esepten shyǵarý talonyn alýym kerek», - dedi spıker.

Aıtýynsha, búgingi kúni barlyq saılaý ýchaskeleri saılaý jáshikterimen, memlekettik rámizdermen jabdyqtalǵan.

«Barlyq ýchaskelik komıssııalar kandıdattar týraly aqparattyq materıaldarmen, sondaı-aq saılaýshylardy qyzyqtyratyn ádistemelik quraldarmen qamtamasyz etilgen. Bul rette kandıdattar týraly aqparattyq materıaldardy úgit materıaldarymen shatastyrmaý kerek. Óıtkeni olar ózderi jasaıdy. Barlyq saılaý ýchaskelerinde barlyq aqparat biryńǵaı formatta»,- dep atap ótti Janna Asanova.