Almatyda 1,2 mln AQSh dollary memleketke qaıtaryldy
ALMATY. QazAqparat – Almatynyń sot oryndaýshylary 1,2 mln astam AQSh dollaryn memleket kirisine qaıtardy. Bul týraly Almaty qalasynyń óńirlik kommýnıkatsııalar qyzmetiniń brıfınginde memlekettik organnyń ókili Shyńǵys Zakeshov málim etti, dep habarlaıdy QazAqparat tilshisi.
Spıkerdiń sózinshe, 2023 jyldyń birinshi jartyjyldyǵynda memleket múlkine boryshkerlerdiń aqshalaı qarajatyn tárkileý esebinen 1 201 300 mln astam AQSh dollary, sondaı-aq 155 544 502 mln teńge óteldi. «Joǵaryda atalǵan qarjyǵa qosymsha 9 kólik, 4 páter túrindegi jyljymaıtyn múlik, turaq túrindegi 2 jyljymaıtyn múlik, 50,3 mln teńgege halyq tutynatyn taýarlar, basqa da zattaı aıǵaqtar memleket kirisine ótkizildi (altyn buıymdar, orgtehnıka jáne taǵy basqalary)», - dedi dedi Almaty qalasy Ádilet departamentiniń múlikti memleket kirisine aınaldyrý jónindegi aýmaqtyq bólim fılıalynyń basshysy Shyńǵys Zakeshov.
Sonymen qatar ol múlikti tárkileýdi sot oryndaýshylary atqarýshylyq is júrgizý sheńberinde qylmystyq ister jónindegi sot úkimi negizinde,sondaı-aq ákimshilik ister boıynsha ákimshilik quqyq buzýshylyq jónindegi sot qaýlysy negizinde júzege asyratynyn atap ótti.
«Tárkileý tek qylmystyq jolmen alynǵan nemese qylmystyq jolmen alynǵan qarajatqa alynǵan múlikke ǵana qoldanylady. Tárkilenýge jatatyn múlik úkimniń qarar bóliginde naqty aıtylýy tıis. Eger is boıynsha múliktiń paıda bolýynyń qylmystyq sıpaty týraly málimetter bolmasa ne múlik múlde belgilenbese, múlikti tárkileý, onyń ishinde qylmystyq kodekstiń osy qosymsha jaza túrin mindetti túrde taǵaıyndaýdy kózdeıtin erekshe bóliginiń baptary boıynsha taǵaıyndalmaıdy», - dedi Almaty qalasy Ádilet departamentiniń ókili.
Onyń aıtýynsha, tárkilenýge jatatyn múliktiń ornalasqan jeri anyqtalǵan kezde sot oryndaýshysy ýákiletti organǵa atqarý qujatynda kórsetilgen tárkilengen múlikti qabyldaý qajettigi týraly habarlama jiberedi.
