Almaty zoologııalyq parki 80 jyldyǵyn atap ótýde
ALMATY. QazAqparat - Búgin Almaty zoologııalyq park óziniń 80 jyldyǵyn atap ótýde, dep habarlaıdy QazAqparat tilshisi.
Osy kúni kelýshilerge kontserttik baǵdarlama, túrli kórmeler, sheberlik synyptary, konkýrstar, ańdarǵa ashyq jem berý uıymdastyryldy. Kire beriste balalardy túrli ańdar kostıýmderin kıgen anımatorlar qarsy alýda.
Almaty qalasynyń ákimi Baýyrjan Baıbek 80 jyldan beri jumys istep kele jatqan zoologııalyq park ujymy men qalalyqtardy quttyqtady, Almaty zoologııalyq parkiniń elimizdegi eń kóne parkterdiń biri ekenin, alǵashqy kelýshilerin sonaý 1937 jyly qarsy alǵanyn atap ótti.
Onyń alǵashqy ekspozıtsııalary 7 gektarǵa ornalasqan edi, keıin birtindep aýmaǵy ulǵaıa bastap, 22 gektarǵa deıin jetti, alǵashqy jyldary kollektsııada nebári ań men janýarlardyń onǵa jýyq túri bolsa, qazir munda olardyń sany 4 myńnan asady.
«80 jyldyń ishinde zoopark almatylyqtar men ońtústik astana qonaqtary úshin jıi keletin súıikti demalys ornyna aınaldy. Bizdi munda ata-anamyz alyp keletin, biz baqytty edik. 30-40 jyldan soń Sizderdiń balalaryńyz ózderiniń balalaryn alyp kelip, meni ata- anam osynda alyp kelgen edi deıtin bolady. Qazir megapolıste aýqymdy abattandyrý jumystary júrýde, onymen qalanyń tarıhı ortalyǵynyń úshten biri qamtylǵan, kósheler ǵana emes, úılerdiń syrtqy kelbeti de kóriktenýde, jumys «qala adamdar úshin» prıntsıpi boıynsha júzege asýda. Bul oń isten zoopark te syrt qalǵan joq. Ony jańartý úshin nemis arhıtektory Pıter Razbahtyń sheberlik- jospary jasaldy, kezinde ol Dıýsseldorftaǵy, Berlındegi, Tegerandaǵy, Dýbaıdaǵy, Týrındegi zooparkterdiń jobasyn jasaǵan», - dedi Almaty qalasynyń ákimi.
Ol joba negizinde zooparktiń geografııalyq aımaq prıntsıpi boıynsha 90%-ǵa jańaratynyn, qurylymy tolyq ózgeretinin, ańdardy ashyq tabıǵatta qorektindirý prıntsıpiniń júzege asatynyn aıtty.
Zoologııalyq park dırektory Erjan Erkinbaev búgingi kúni munda ańdardyń ólimine jol bermeý úshin naqtyly sharalardyń júrgizilip jatqanyn, olardy azyqtandyrý ratsıonynyń qaıta jasalǵanyn, azyq sapasynyń baqylaýda ekenin,volerlerdiń qaıta jasalǵanyn, jappaı abattandyrý jumystarynyń júrip jatqanyn aıtty.
«Mysaly, aq jáne gımalaı aıýlarynyń qazir keń basseınderi bar, shóbi men aǵashy bar aýla paıda boldy. Akvarıým, amýr tıgrynyń orny jańǵyrtylýda, ekzotıkalyq qustar volerleri jańarýda. Osynyń barlyǵy ákimdiktiń, bizge nıet bildirgen dostarymyz ben demeýshilerdiń qoldaý arqasynda iske asty.Zooparkti qarjylandyrý da edáýir ósti.Eger 2016 jyly jergilikti bıýdjetten 409 mln. teńge bólinse, bıylǵy qarjy 500 mln. teńgeni quraıdy. Sonymen qatar, zoopakrtiń óz tabysy 300 mln teńge jýyq, demeýshilik kómek - 140 mıllıonnan astam. Zooparktiń jaqsy jaqqa qaraı ózgerýi kelýshiler qataryn da kóbeıtti, olardyń qatary 20%-ǵa ósti», - dedi E.Erkinbaev.
Almaty ákimi zoopark qyzmetkerlerin eskertkish dıplomdarmen, syılyqtarmen marapattady. Olardyń keıbireýleri munda 20 jyl boıy jumys istegen eken, qıyn kezeńderge qaramastan súıikti isterin tastamaǵan.
