Almaty zoobaǵynyń janýarlary qalaı uıyqtaıdy
ALMATY. QazAqparat - Almaty zoobaǵynyń ujymy búkilálemdik uıqy kúnin atap ótpek, dep habarlaıdy QazAqparat tilshisi.
Bıyl mereke álemde 15 naýryzda toılanady. Al, Almaty zoobaǵy bıyl birinshi ret tynyshtyq saǵatyn ótkizip otyr.
«Janýarlar aǵzasy úshin de uıqynyń mańyzy joǵary. Olar da uıyqtaǵandy, kún shýaǵyna qyzdyrynǵandy jaqsy kóredi. Bul kúni kez kelgen adam zoobaqqa kelip, janýarlardyń myzǵyǵanyn tamashalaı alady. Bizde eń qus uıqyly nemese kerisinshe eń maýbas janýarlar bar», - dedi zoobaqtyń dırektorynyń mindetin atqarýshy Aıgúl Tóleeva.
Zoobaqtyń fotografy Mıhaıl Sorokoýmov janýarlardyń uıqysyn baqylap júrgen mamandardyń biri.
«Uıqysyz eshqandaı janýar durys ómir súre almaıdy. Zoobaqta bul protsesti kórýge bolady. Aıýlar aıaqtaryn sozyp uıyqtaǵandy unatady. Eger kirekeı (urǵashy aıý-avt) qasynda qonjyǵy bolsa, ol balalaryn qushaqtap jatady. Jabaıy mysyqtar, arystandar men barystar bir búıirlep jatqandy unatady», - dedi Mıhaıl Sorokoýmov.
Ǵalymdardyń aıqyndaýynsha, jyrtqyshtar tabıǵatta eń uzaq uıyqtaıdy eken. Al shópqorekti tuıaqtylar eń sergek uıyqtaıtyn janýarlar.
Mysyqtektester - túngi janýarlar. Olar kúndiz 14 saǵattaı uıyqtap, túnde joryqqa shyǵady.
«Kerikter birneshe apta boıy uıqysyz ómir súre alady. Olarǵa eki saǵat myzǵyp alý jetkilikti. Kerikter qaýipsizdik úshin kóp uıyqtaı almaıdy. Uıyqtasa da jıi oıanyp, jan-jaǵyn jıi baqylap turady. Olar tik turyp alyp, moınyn jon arqasyna tósep uıyqtaı alady. Pilder basyn joǵary kóterip etpetinen jatady. Pilderge 3 saǵat uıqy jetedi. Bizdiń qyzmetkerler osy ýaqytqa deıin pildiń nemese keriktiń uıyqtaǵan sátin kórgen joq», - dedi Mıhaıl Sorokoýmov.
Kóptegen janýarlar toptasyp uıyqtaıdy. Pilder men túlkiler bir-birine uıysyp uıyqtaıdy.
Buǵy, taý eshkileri sııaqty múıizdi janýarlar uıyqtaǵan kezde múıizderiniń salmaǵy basyp ketpes úshin tepe-teńdik saqtap etpetinen jatady. Qoqıqaz bir aıaǵyn kóterip alyp, basyn qanatynyń astyna tyǵyp alyp myzǵıdy. Onyń kózi jan-jaqty baqylaý úshin únemi ashyq turady.
