Almaty zoobaǵynyń mekendeýshileri qystyq «kıimderin» aýystyryp jatyr
ALMATY. QazAqparat - Almaty haıýanattar baǵynyń janýarlary jaz maýsymyna daıyndalyp, qysqy «kıimderin» aýystyryp jatyr, dep habarlaıdy «QazAqparat» HAA tilshisi.
Zoobaq qyzmetkerleriniń aıtýynsha, janýarlar jazǵa daıyndala bastasa, naǵyz kóktem keldi degen sóz.
«Biz de qystyq kıimderimizdi aqyryndap aýystyrýymyz kerek, óıtkeni kóktemgi aýa raıy qubylmaly», - deıdi Almaty zoobaǵynyń fotografy Mıhaıl Sorokoýmov.
Janýarlar da kóktemge ózderinshe daıyndalady. Barlyq janýarlar da qystyq kıimderin jazdyq kıimge almastyrady. Al, kún sýytqan kezde olarda ózdiginen tabıǵat syılaǵan jyly kıim paıda bolady.
«Kóktem kelisimen kún uzaryp, haıýanattar baǵyna kelýshiler de arta túsedi. Mundaǵy janýarlardyń keıbiri jazǵy oryndaryna kóshirildi. Bir sózben aıtqanda, jyly kúnder bastaldy, kún ábden jylyǵanda janýarlardyń barlyǵy jazǵy torlarǵa aýystyrylady», - dedi Almaty zoobaǵy dırektorynyń mindetin atqarýshy Aıgúl Túleeva.
Zoobaq fotografy janýarlardyń qystyq kıimderin aýystyryp, uıalaryn salyp, balapan basýǵa daıyndalyp jatqan sátterin sýretke túsirip aldy.
«Aqqý men taýystar «kıimderin» jazǵa deıin asyqpaı aýystyrady. Mysyqtar men aıýlarda bul úderis asa baıqala qoımaıdy. Al, túıe, qoı jáne buǵylardyń júnderin qosymsha qyrqýdy qajet etetin sátter bolady», - dedi Mıhaıl Sorokoýmov.
