Almaty zoobaǵynyń burynǵy esepshisi: Men qylmys jasaǵan joqpyn
ALMATY. QazAqparat - Almatyda 32 mln teńgeni jymqyrdy degen kúdikpen ustalǵan zoobaq esepshisi sot aldynda sońǵy sózin aıtty, dep habarlaıdy QazAqparat tilshisi sot zalynan.
Іsti sýdıa Farrýh Omarov qarap jatyr.
«4 aı boıy qamaýda otyrý - men úshin úlken jaza. Senip tapsyrylǵan múlikti urlady degen aıyp taǵyldy. Shyn júregimmen aıtaıyn, men qylmys jasaǵan joqpyn. Meniń qylmystyq oı-pıǵylym bolǵan joq. Men ádildik jeńetinine senemin. Prokýror suraǵan jaza men úshin tym aýyr dep sanaımyn. Tek qana kásiporyn basshylyǵy tıisti tekserýlerden soń qajetti sharalardy jasaýǵa eringeni úshin meni bas bostandyǵynan aıyrmaýyńyzdy ótinemin», - dedi Marına Nazarova.
Іs materıaldaryna sáıkes, Almaty zoobaǵynyń esepshisi bıletterdi satý barysynda kompıýterden 32 mln teńgeni joıyp jibergen.
«Nazarova Marına býhgalterlik esepti júrgizýge jaýapty tulǵa bola otyryp, býhgalterlik qujattarǵa qasaqana jalǵan aqparat engizgen. Osylaısha ol Almaty zoologııalyq parki MKK-ine zalal keltirip, QR QK 241-babynda kórsetilgen qylmys jasady. Sonymen qatar, óziniń qyzmettik laýazymyn óz múddesine paıdalanyp, ózine senip tapsyrylǵan múlikti urlady. Osylaısha oǵan QR QK 189-babynyń 4-bólimi boıynsha aıyp taǵylyp otyr», - dedi prokýror Erjan Quraqbaev.
Jaryssóz barysynda prokýror Erjan Quraqbaev sottalýshyny aıypty dep tanyp, 8 jylǵa bas bostandyǵynan aıyrýdy suraǵan bolatyn.
Sot barysynda Marına Nazarova kinásin moıyndamady.
Aıta ketý kerek, 37 jastaǵy kúdikti Marına Nazarova 14 tamyzda ustalǵan bolatyn. Oǵan qarsy quny 32 mln teńge bolatyn bıletterdi kompıýterden joıyp jiberdi degen aıyp taǵyldy.
Úkim 20 jeltoqsanda 12:00-de shyǵatyn boldy.
