Almaty zoobaǵynyń ákimshiligi janýarlardy aptap ystyqtan qalaı qorǵaıtynyn aıtty
ALMATY. QazAqparat – Almaty zoobaǵynda Avstralııadan Muzdy muhıtqa deıingi aralyqty mekendeıtin, álemniń barlyq klımattyq zonasynan jınalǵan janýarlar bar. Olar aptap ystyqtan qalaı qorǵanýda? Zoobaq ákimshiligi qyzyq vıdeomen bólisti, dep QazAqparat tilshisi.
«Kún ystyq, qapyryq. Kóp adam zoobaqtaǵy janýarlar aptap ystyqqa qalaı shydaıdy dep suraq qoıady. Bizdegi janýarlardyń barlyǵy qajetti sýmen qamtamasyz etilgen. Biraq haıýanattar baǵyna kelýshiler janýarlarǵa arnalǵan sý quıatyn ydystardy baıqaı bermeıdi. Mysaly, ıagýar, leopard, pýma, túlki, qasqyrlarǵa beriletin sý tehnıkalyq aımaqta ornalastyrylǵan ydystarda bolady. Ol jer sýdy jıi aýystyryp turýǵa qaýipsiz ári yńǵaıly. Tehnıkalyq aımaqtaǵy sýlar taza ári salqyn bolyp turady. Sondyqtan sýlardy biz negizinen úıshikterge, kóleńkege qoıamyz. Sý quıylǵan ydystar syrttaǵy qorshaýda tursa ysyp, buzylyp ketedi. Borsyq, aq aıý, jolbarystar basseıinde shomylǵandy jaqsy kóredi. Al pilder úshin arnaıy sensorly dýsh ornatylǵan», - delingen habarlamada.
Beınejazbadan zoobaq janýarlarynyń qalaı shomylyp, dýsh qabyldaǵanyn, sondaı-aq shımpanzeniń balmuzdaqty qalaı jeıtinin kórýge bolady.
«Almaty zoobaǵyna tańerteńgi ýaqytta jáne keshki mezgilde kelýge qolaıly. Zoobaq tańǵy 09.00-den keshki 20.00-ge deıin jumys isteıdi. Kassalar bir saǵat buryn jabylady»,- dep atap ótti zoobaqtan.
Buǵan deıin Almatyda aptap ystyq 20 shildege deıin saqtalatyny týraly jazǵan edik.
