Almaty zoobaǵyndaǵy saharadan kelgen janýarlar aıazda qalaı ómir súrip jatyr
ALMATY. QazAqparat - Almaty ákimdigi sarshunaq aıazda zoobaqtaǵy janýarlardyń tońyp qalmaýyna kúsh salyp jatyr, dep habarlaıdy QazAqparat tilshisi.
Úskirik aıazǵa Afrıkadan ákelingen jylý súıetin janýarlar pilder, kerikter, zebralar, maımyldar men kazýarlar tótep bere almaı jatyr.
«Aıazdyń kesirinen ekzotıkalyq janýarlardyń qysqy úılerinde aýa temperatýrasy tómendep ketti. Úlken terrıtorııany túrli jylytqyshtarmen jylytý múmkin bolmady. Qalanyń ákimdiginen kómek suradyq. Mamandar tez arada jetip, esh bıýrokratııasyz zoobaqtaǵy jylý jelilerindegi qysymdy kóterip berdi, qajetti temperatýra jasaldy. Bul qala ákimshiligi men kommýnaldy qyzmetteriniń mobıldi jáne tıimdi jumysyn kórsetedi», - dedi Almaty zoobaǵynyń dırektory Erjan Erkinbaev.
Aıta ketý kerek, Almatyda ótken jumadan beri aýa temperatýrasy qatty tómendep ketti.
Sarshunaq aıazdyń kesirinen qalada «Taýgúl» aýdany jylýsyz, ystyq sýsyz qaldy.
Sonymen qatar, keshe Saın-Shalıapın kósheleriniń qıylysyndaǵy ystyq sý qubyry da aıazdan jarylyp ketip, birneshe turǵyn úı sýsyz qalǵan bolatyn.
Sarshunaq aıazdyń kesirinen qala mektepterinde 1-9 synyp oqýshylaryna sabaq toqtatyldy.
