Almaty zoobaǵyndaǵy «kóripkel» maımyl ólip qaldy
ALMATY. QazAqparat - Almaty zoobaǵyndaǵy «kóripkel» shımpanze qaıtys boldy, dep habarlaıdy QazAqparat tilshisi.
Bul týraly aqparat Almaty zoobaǵynyń Instagram paraqshasynda paıda boldy.
«Qurmetti dostar! Sizder bizdiń barlyq jaǵymdy jańalyqtarymyz ben qýanyshtarymyzdy birge bólisip, árdaıym qoldaý bildirip kelesizder. Bul joly qaıǵyly jaǵdaıdy habarlaǵaly otyrmyz. Onkologııalyq aýrý saldarynan Tomırıs atty shımpanzemiz qaıtys boldy. Kishkentaı Tomıdi emdeý úshin álemdik deńgeıdegi eń bilikti veterınar mamandar tartyldy. Keıde medıtsınanyń ózi aýyr derttiń aldynda dármensiz. Biz úshin bul aýyr jaǵdaı boldy. Tomırısti barlyq zoobaq qyzmetkerleri men kelýshiler óte jaqsy kórdi. Ol óte talantty, shyǵarmashylyqqa beıim janýar edi. Tomı mýzykany erekshe súıip tyńdaıtyn.Tomırıs bizdiń oıymyzda, júregimizde saqtalyp qalady», - dep jazdy zoobaq ákimshiligi.
Aıta keteıik, 2014 jyly Almaty zoobaǵynda Tomırıske álem kýbogynyń fınalıstteri - Germanııa men Argentına quramalarynyń týyn usyndy. Ol Germanııa týyn tańdady. Nátıjesinde nemister 1:0 esebimen Álem kýbogyn jeńip aldy.
Sodan beri ony zoobaq qyzmetkerleri men kelýshiler «kóripkel» Tomı deıtin.
