Almaty zoobaǵyndaǵy qoqıqazdardyń vıdeosy jurtshylyqty tánti etti
ALMATY. QazAqparat – Almaty haıýanattar baǵynyń toǵanynda serýendep júrgen qyzǵylt qoqıqazdar áleýmettik jeli qoldanýshylardy tánti etti, dep habarlaıdy QazAqparat tilshisi.
Qyzǵylt qoqıqazdardyń ádemi beınesi Almaty zoobaǵynyń Instagram-paraqshasynda jarııalandy.
«Bul kezde zoobaqta da erekshe jaǵdaı boldy. Aýa raıy ystyq emes, shýly tirshilik saıabyrsyp, aınalada tynyshtyq ornaǵan. Janýarlardy emin-erkin tamashalaýǵa múmkindik kóp. Kúzgi boıaýlardyń arasynda bizdiń qyzyl qoqıqazdar da erekshe kórinedi. Sizderdi Altyn kúzdiń kórkin tamashalap, zoobaǵymyzdy aralaýǵa shaqyramyz»,- dep jazylǵan Almaty zoobaǵynyń Instagram-paraqshasynda.
Jaqynda Aqmola oblysyndaǵy Qorǵaljyn qoryǵynda 5 myńǵa jýyq qoqıqaz vıdeoǵa ilindi. Ony Qazaqstannyń bıologııalyq alýantúrlilikti saqtaý qaýymdastyǵynyń qyzmetkerleri túsirip alǵan.
Aıta keteıik, Qyzǵylt qoqıqaz Qazaqstannyń Qyzyl kitabyna engizilgen jáne álemde onyń 10-nan astam túri kezdesedi.
Vıdeodan alynǵyn kadr
