Almaty zoobaǵyndaǵy kári quzǵynnyń jasy 60-qa taıady
ALMATY. QazAqparat - Kári quzǵynnyń Almaty haıýanattar baǵynda ómir súrip jatqanyna 58 jyldan asyp ketti, alaıda naqty jasyn eshkim dóp basyp aıta almaıdy, dep habarlaıdy QazAqparat tilshisi.
Eń uzaq jasaýshy quzǵyn haıýanattar baǵyna 1960 jyly Máskeý zoobaǵynan ákelingen. Onyń jasy 60-tyń shamasynda.
Zoobaq mamandarynyń aıtýynsha, onyń qansha jasqa kelgenin eshkim aıta almaıdy.
«Tabıǵatta ádette qustar 38 jylǵa deıin ómir súredi. Al onyń munda turyp jatqanyna 58 jyldan asty. Degenmen, naqty jasyn eshkim bilmeıdi. Ózin naǵyz tájirıbeli ardager sekildi ustaıdy. Aqyldy, baısaldy. Bir qyzyǵy, osy kúnge deıin onyń esimi qoıylmaǵan. Eshqandaı laqap atqa nazar aýdarmaıdy. Qaıtken kúnde de uzaq jasaýshylarǵa kórsetiletin syı - qamqorlyq, ıaǵnı kútim men tamaqtandyrý»,-deıdi zoobaq dırektorynyń orynbasary Dana Shúlembaeva.
Mamandardyń aıtýynsha, janýarlar jabaıy tabıǵatqa qaraǵanda zoobaqta uzaq ómir súredi eken. Sebebi munda olar úshin tıisti qaýipsizdik sharalary jasalǵan. Olar tolyqqandy tamaqtanady ári veterınar kómegimen qamtamasyz etilgen.
Ár zoobaqta ejelden ómir súrip kele jatqan kári ańdar bar. Almatylyq zoobaqta burynnan kele jatqan janýarlar sany 30-dan asady. Onyń ishinde qustar, aq aıý Alkor, Emý túıequsy, múıizdi quzǵyn, gımalaı aıýy, tipti jyldan uzaq jasaǵan qońyzdar da bar. Olardyń sany 10-ǵa jetedi.
