Almaty zoobaǵyndaǵy kári aq aıýǵa evtanazııa jasaldy
ALMATY. QazAqparat – Almaty zoobaǵy 31 jasar aq aıý Alkormen qoshtasty, dep habarlaıdy QazAqparat tilshisi.
Bul aqparat zoobaqtyń Instagram jelisindegi resmı paraqshasynda jarııalandy.
«Búgin qaıǵyly kún. Alkordyń jaǵdaıy qıyndap jatqanyn habarlaǵan bolatynbyz. Sońǵy 2 aıda Reseı, Izraıl zoobaqtarynyń veterınar dárigerlerimen, EAZA mamandarymen birlese otyryp, Alkordy emdeý úshin barynsha kúsh saldyq. Biraq kárilikti emdeı almaımyz. Sońǵy ýaqytta ol jeńsik asynan da bas tarta bastady. Halyqaralyq zoobaqtar qaýymdastyǵynyń mamandarymen keńese otyryp búgin osy bir aýyr sheshimdi qabyladyq. Alkordy qınalýdan qutqarý úshin veterınarlar evtanazııa jasady. Alkor bizdiń júregimizde máńgilik qalady»,- delingen jazbada.
Ol Almaty zoobaǵyna 1990 jyly 1 jasar qonjyq kezinde kelgen. Bıyl 7 jeltoqsanda aıý 31 jasqa toldy.
Munyń aldynda zoobaq Alkordyń ahýaly nasharlaýyna baılanysty volerdiń áınek qabyrǵasyn japqan bolatyn.
Eske sala ketsek, aq aıý Halyqaralyq Qyzyl kitapqa engen. Qazir álemde 20 myń aq aıý ǵana bar.
Foto: Mıhaıl Sorokoýmov
