Almaty zoobaǵyndaǵy aýrý jolbarysty qutqaryp qalý múmkin emes - reseılik veterınar
ALMATY. QazAqparat - «Almaty haıýanattar baǵyna kómek» qorynyń shaqyrtýymen zoobaq janýarlaryn tekserýge kelgen Máskeýlik veterınarlyq dáriger óz boljamyn aıtty. Onyń aıtýynsha, Quralaı atty amýr jolbarysyna endi eshkim kómek kórsete almaıdy.
«2016 jyly naýryzda túsken rentgen túsirilimin, taldaýyn qarap shyqtym. Janýar azyp-tozyp, ólimniń az-aq aldynda tur. Qozǵalys joq. Ydystaǵy tamaqqa jaqyndaǵan da joq. Onyń ómirin arashalap qalý múmkin emes. Janýardy uıyqtatý kerek. Qant taldaýy kórsetkendeı, leıkotsıtter tómendep ketken. Negizgi bronhtary men tamyrlary zaqymdanǵan. Uzaq jatystan jambasy oıylyp ketken. Lımfoıdtik ulpanyń onkologııalyq zaqymdanýyna uqsaıdy», - dedi Mıhaıl Alshınetskıı.
Dáriger veterınarlyq zertteýlerdiń áýel bastan nege jasalmaǵanyna tań qaldy.
«Nege basynan qan taldaýy, taǵy basqa zertteýler jasalmaǵan? Janýardy emdeýge múlde kómegi tımeıtin dárilik zattar paıdalanylǵan. Amýr tıgrleri óte iri, tózimdi jyrtqyshtar. Olar tabıǵattyń qatań jaǵdaıyna beıimdelgen. Sondyqtan olardyń ólimi de uzaqqa sozylýy múmkin», - dedi ol.
Sarapshy eń durys sheshim janýardy óltirý dep sanaıdy.
«Almaty zoobaǵy EAZA múshesi bolǵandyqtan etıkalyq kodeksti saqtaı otyryp, Quralaıdy azaptan qutqarý kerek», - dedi ol.
Talma aýrýyna shaldyqqan Radanyń densaýlyǵy da (amýr jolbarysy) qaraldy.
Mamannyń aıtýynsha, Radanyń epıleptıkalyq ustamalary mıda isiktiń paıda bolýynan bolýy yqtımal.
«Mıdaǵy ózgeristerden soń jolbarys óz quıryǵyn ózi kemirgen. Antıbıotık terapııasyn 1 aı boıy jalǵastyrý kerek. Jyrtqyshtyń basyn magnıttik rezonanstyq tomografqa túsirý kerek. Sondaı-aq, qannyń jalpylama taldaýyn jasaý shart. Talmaǵa qarsy terapııany da toqtatpaý kerek», - dedi ol.
Janýarlar jónindegi maman aq aıý Alkordyń basseınin jıi jańartyp turý kerektigin aıtty.
«Basyna ósip shyqqan isikti zerttep, synǵan tisin alyp tastaý bolmasa ary qaraı emdeý úshin rentgen túsirý kerek», - dedi sarapshy.
Aıta ketý kerek, buǵan deıin Almaty haıýanattar baǵyndaǵy kúrdeli ahýal týraly aıtylǵan bolatyn. Osy ýaqytqa deıin zoobaqta 6 qar barysy, 1 shımpanze ólgeni anyqtaldy.
Al, sońǵy kezde Quralaı men Rada atty amýr jolbarystary men Alkor atty polıar aıýynyń densaýlyǵy syr bergen.
