Almaty zoobaǵyndaǵy Alkor atty aq aıý 30-ǵa toldy
ALMATY. QazAqparat - Búgin Almaty zoobaǵynyń baıyrǵy turǵyny, tanymal Alkor esimdi aq aıý 30 jasqa toldy, dep habarlaıdy QazAqparat tilshisi.
Alkor nemese Kolıa esimdi aq aıý búgin 30 jasqa toldy. Adam ómirimen ólsheıtin bolsaq, 100-ge keldi. Zertteýlerge sáıkes, tabıǵat aıasynda aq aıýlar 20 jasqa deıin, urǵashylary 25-30 jasqa deıin ómir súredi.
Alkor 1989 jyly Kalınıngrad zoobaǵynda týǵan. 1990 jyldan beri Almaty zoobaǵynda ómir súrip keledi.
«Buǵan deıin Alkordyń urǵashy «qurbysy» Krıstına bar bolatyn. Bul janýar da uzaq ómir súrdi. Ekeýinen Ýmka esimdi qonjyq bar. Qazir Ýmka cheh zoobaǵynda turyp jatyr»,- deıdi Almaty zoobaǵynyń ókili Mıhaıl Sorokoýmov.
Haıýanattar baǵynyń bas veterınar mindetin atqarýshy Alına Chımırýk aq aıýdyń azyǵy týraly aıtty.
«Alkordyń jasyn eskerip oǵan arnaıy as mázirin daıyndaımyz. Kóbine túrli botqalar, balyq, balyq maıyn beremiz. Ol etti óte jaqsy kóredi. Sonymen qatar, kókónis pen jemis-jıdek jeıdi. Únemi veterınar dárigerdiń baqylaýynda»,-dedi ol.
Alkor týraly QazAqparat buǵan deıin de jazǵan.
Foto: Mıhaıl Sorokoýmov
