Almaty zoobaǵynda janýarlardyń tisin qalaı tazalaıdy
ALMATY. QazAqparat - Jabaıy tabıǵat aıasynda janýarlardyń ómiri tabıǵat zańymen úndesip jatady. Al zoobaqta ómir súrip jatqan haıýanattar úshin qarapaıym tis tazalaýdyń ózi belgili bir protseske aınalady.
Qalalyq zoobaqtyń baspasóz qyzmeti QazAqparat tilshisine iri janýarlardyń tisin tazalaý qalaı júrgiziletinin aıtyp berdi.
Tabıǵat aıasynda sýsıyrlardyń tisin usaq balyqtar tazalaıdy eken. Al zoobaqtyń sýsıyrlarynyń tisin qyzmetkerler tazalaıdy.
«Zoobaq sýsıyrlardyń tisin kúnine 5-6 ret arnaıy şetkamen tazalaıdy. Jambolat bul protseske úırenip aldy. Al jańadan kelgen Sharlottaǵa bul tań nárse bolyp júr», - dedi zoobaq qyzmetkeri Mıhaıl Sorokoýmov.
Shópqorekti janýarlarǵa tis tazalaýdyń qajettiligi joq.
Sebebi, olar qabyǵy qatty aǵash butalaryn kemirgende tisteri ózi-aq tazalanyp ketedi.
«Búgin birinshi ret pilderdiń tis tazalaý protsesin túsirip aldym. Olardyń tisteri ómirinde 4 ret almasatynyn eskersek, pilderdi asa taza janýar dep ataýǵa bolady. Pilderdiń ratsıonyna aǵash butaqtary kiredi. Pil Lao japyraqtardy jep bolǵan soń butaqty syndyryp, odan tis tazalaıtyn qural jasap aldy», - dedi M.Sorokoýmov.
Shanhaı zoobaǵynda janýarlardyń tis tazalaý protsesi úlken shoýǵa aınalady. Ony kórý úshin adamdar kóptep jınalady eken.
Al qoltyraýyn múlde tisin tazalamaıdy eken. Olardyń ómirinde tisteri 2-3 myń ret aýysady eken. Kemirgishterdiń de tisi únemi jelinip, qaıtalap ósip otyrady.
Jyrtqysh ańdar bolsa tisterin qorektenip jatqanda tazalaıdy. Jemtigin jep jatqanda olardyń tisteri teri men súıekke úıkelip, ózi-aq tazalanady eken.
Al tisi synyp qalǵan janýarlardyń odan ary ómir súrýi óte qıyn. Sebebi, tisi bolmaǵan jaǵdaıda jyrtqyshtar ań aýlaı almaı qalady.
