Almaty zoobaǵynda taǵy bir janýar «baspanaly» boldy
ALMATY. QazAqparat - Almaty haıýanattar baǵynyń taǵy bir janýary jańa baspanaǵa kóshti, dep habarlaıdy QazAqparat tilshisi.
Shoshqa tuqymdasqa jatatyn Martın atty tapırdiń «apartamenti» 760 sharshy metrdi alyp jatyr. Onyń 90 sharshy metr aýmaǵynda jańa basseın salyndy. Sonymen qatar, kóleńkeli jáne qumdy aımaq, batpaqty vanna jasaldy.
Baspana máselesin sheship alǵan soń zoobaq qyzmetkerleri ony «úılendirýdi» josparlap otyr. Urǵashy tapır Novosibir qalasynan ákelinedi. Qys mezgilinde olar jyly orynǵa kóshiriletin bolady.
Aıta ketý kerek, buǵan deıin Almaty zoobaǵynda birqatar janýarlardyń eski volerleri buzylyp, qaıta jasalǵan bolatyn. Onyń ishinde aq aıý Alkor, Qazaqstandaǵy eń uzyn pıton bar.
Almatylyq bıznesmender aq aıýmen qatar qara aıýlardyń jaǵdaıyn jaqsartýǵa kiristi. Jaqyn arada aıýlar men amýr jolbarysy ekspozıtsııasynyń qurylysy bastalady.
