Almaty zoobaǵynda Prjevalskıı jylqysy qulyndady
Zoobaqtyń baspasóz qyzmetiniń málimetinshe, Prjevalskıı jylqysynyń qulynyna Karmela aty berilgen.
«Bul jylqylar haıýanattar baǵynyń arqasynda ǵana aman qaldy dep aıta alamyz. Prjevalsk jylqysynyń jańa tóliniń ómirge kelýi – úlken qýanyshty jaǵdaı. Kishkentaı qulynnyń tábeti jaqsy, sergek bolyp ósip keledi. Kishkentaı Karmelaǵa myqty densaýlyq, uzaq ómir tileımiz», - dep jazylǵan Almaty zoobaǵynyń Instagram-paraqshasynda.
Prjevalsk jylqysy – jer betinde bizdiń dáýirimizden buryn paıda bolǵan. Zoobaqtyń habarlaýynsha, olar Azııa qurlyǵyndaǵy jabaıy jylqylardyń ishindegi eń sırek kezdesetin túri.
«Ataqty orys geografy jáne zertteýshisi, polkovnık Nıkolaı Prjevalskıı bul jabaıy jylqy túrin 1878 jyly Ortalyq Azııadaǵy Lob-Nor kóliniń mańynda kezdestirgen. Osy jańalyq ashylǵannan keıin Prjevalsk jylqylary dep atalyp ketken. Olar Qazaqstannyń ǵana emes, dúnıejúziniń «Qyzyl kitabyna» engizilgen»,- dedi zoobaq ókilderi.
Buǵan deıin Almaty zoobaǵynda kerik tóldegenin jazǵan bolatynbyz.
Foto: www.instagram.com/almatyzoo
