Almaty zoobaǵynda pilder qalaı ómir súrip jatyr
Búginde Almaty haıýanattar baǵynda Arýjan jáne Lao atty eki pil turady. Ekeýi de Laostan 2000 jyly kelgen. Lao, 27 jasta. Onyń juby Arý odan eki jas kishi.
«Lao – jasy úlken pil bolǵandyqtan keıde onyń kózi men qulaǵynyń tusynan aşşy ter sııaqty suıyqtyq aǵatyn kezderi bolady. Bul jaǵdaı «mýst» dep atalady. Syrttan qaraǵan adamǵa pildiń kózderinen jas aǵyp, jylap turǵandaı kórinedi. Mundaı kezde pilder ashýly, yzaly bolyp, aınalasyna qaýip tóndirýi múmkin. Ońtústik Azııa elderinde qolǵa ustaıtyn pilderdi «mýst» kezinde shynjyrlap, baǵanǵa baılap qoıady. Biraq biz bulaı istemeımiz. Bul jaǵdaıda biz pilderdi bir birinen bólek qorshaýda ustaımyz. Bul eń aldymen qaýipsizdik úshin, Lao agressııa kezinde Arýdy jaraqattap almaýy úshin jasalady»,- deıdi zoobaq mamandary.
Aıtýlarynsha, «Mýst» kezeńi Laoda jylyna 3-4 ret bolady jáne 1 aıdan 3 aıǵa deıin sozylady.
Pilderge beriletin sý tehnıkalyq aýmaqta, úlken bóshkede bolady. Ol jerge kelýshiler kire almaıdy. Biraq pilder qalaǵan kezderinde bóshkedegi sýdy iship, shólin qandyra alady. Ydystaǵy sý únemi aýysytyrylyp, taza, salqyn sý quıylyp turady.
Haıýanattar baǵynda pildi tamaqtandyrý kúnine shamamen bes-alty ret júzege asyrylady. Almaty zoologııalyq parkindegi sútqorektilerdiń kúndelikti ratsıony kelesi negizgi ónimdermen usynylǵan:
Ár pilge kúnine 100 keliden asa qorek beriledi. Suly jarmasy – 4 kg, suly – 1 kg,bıdaı – 1,5 kg, qara bıdaı nany – 4, kg (5-6 bólke), aq nan – 1 kg (2 bólke), sábiz – 17 kg, qyzylsha – 11 kg, kartop – 11 kg, qyryqqabat – 5 kg, túrli jemister – 3 kg, aǵash, ósimdik sabaqtary – 30 kg, shabylǵan shóp – 15 kg, jasyl shóp – 15 kg, tuz – 0,03 kg, bor – 0,03 kg jáne basqa da kóptegen azyq-túlik beriledi.
«Zoobaǵymyzdaǵy pilder turatyn saraı 1962 jyly salynǵan. Bıyl, Almaty qalasy ákimdiginiń qoldaýymen biz pilderge, sýsıyrlar men kerikterge, zebra, antılopalarǵa arnalǵan «Afrıka savannasy» keshenin salatyn boldyq. Jobalaý smetalyq qujattaý jumystary aıaqtalysymen, jańa keshen qurylysyn bastaıtyn bolamyz. Aldaǵy ýaqytta bul keshende pilderimizde jáne basqa da janýarlarymyzǵa erekshe jaǵdaı jasalatyn bolady»,- dep atap ótti zoobaqtan.
