Almaty zoobaǵynda qulaǵan aǵash taýeshkini basyp qaldy
ALMATY. QazAqparat - Almaty zoobaǵynda tótenshe jaǵdaı boldy, dep habarlaıdy QazAqparat tilshisi.
Keshegi daýyldan qýraǵan aǵash qulap, aǵash dińi taýeshkini basyp qalǵan. Janýar sol jerde óldi.
Bul týraly Feısbýkte Almaty zoobaǵynyń dırektory Erjan Erkinbaev jazdy.
«Keshe surapyl daýyldan zoobaqtaǵy eski bóreneler men aǵashtar qulady. Tabıǵattyń tosyn minezinen bul joly myna keremet janýar ólip qaldy. Qalalyq Tabıǵatty paıdalaný basqarmasy men aýdan ákimdiginen @akimat_medeu shuǵyl túrde qýraǵan aǵashtardy kesý úshin arnaıy tehnıka suratyp jatyrmyz. Bul aǵashtar janýarlar úshin ǵana emes, kelýshiler úshin de qaýipti bolyp otyr», - dedi Erjan Erkinbaev.
