Almaty zoobaǵynda qonjyqty óltirip tastady – feık

ALMATY. QazAqparat – Almatydaǵy haıýanattar baǵynda Gımalaı qonjyǵyn uıyqtatyp tastady degen aqparat — feık. Bul týraly Stopfake.kz saıty jazdy, dep habarlaıdy QazAqparat tilshisi.

Stopfake.kz saıtynyń habarlaýynsha, qaznette Almaty haıýanattar baǵynda dúnıege kelgen Gımalaı qonjyǵy qyzǵa shabýyl jasaǵany úshin uıyqtatylǵany týraly habar taratylǵan. Oǵan qonjyqtyń qyzǵa shabýyl jasaǵany kórsetilgen beıne rolık qosa berilgen. Shyn máninde bul vıdeo 17 mamyrda Groznyı qalasynda túsirilgen .

«Vıdeo jergilikti (Groznyıdaǵy - red) haıýanattar baǵynda túsirilgen, al qyz qonjyqty óz erkimen qolyna alǵan. Janýar qatty tistep alǵandyqtan, jábirlenýshi aýrýhanaǵa júgingen. Osydan keıin ol polıtsııaǵa aryz jazyp, qonjyqtyń tumyldyryǵy bolmaǵanyna shaǵymdanǵan. Qazir tótenshe jaǵdaılar jónindegi tergeý komıteti qaýipsizdik talaptaryna saı emes qyzmet kórsetý faktisi boıynsha tergeý júrgizýde. Qonjyqty uıyqtatyp tastaý máselesi kóterilgen joq.

Bul jaǵdaıdyń Almaty haıýanattar baǵyndaǵy qonjyqqa eshqandaı qatysy joq. Kadrlarda Almatyda týǵan aıýdyń kólemi men túsi Groznyıda qyzdy tistep alǵan qonjyqqa qaraǵanda ózgeshe ekendigi kórinip tur», - delinedi Stopfake.kz habarlamasynda.

Eske salaıyq, Almaty zoobaǵynda Gımalaı aıýynyń qonjyǵy dúnıege kelgen bolatyn. Qonjyqty týǵan urǵashy aıý jáne atalyǵy ótken jyldyń mamyr aıynda Reseıden Almaty zoobaǵyna ákelingeni týraly habarlaǵanbyz.