Almaty zoobaǵynda qoltyraýyndardy tamaqtandyrýdyń áserli sátteri
ALMATY. QazAqparat - «QazAqparat» agenttigi Almatynyń haıýanattar baǵynda qoltyraýyndardy tamaqtandyrý sátiniń erekshe kadrlaryna ıe boldy.
Álemniń kóptegen haıýanattar baǵynda qoltyraýyndar kóp jaǵdaıda qozǵalyssyz jatady, sebebi olardyń barlyǵy (kaımandar, uzyn tumsyq qoltyraýyndar, allıgatorlar) - salqynqandylar. ıAǵnı, bul reptılııalardyń belsendiligi qorshaǵan ortaǵa baılanysty. Ańshylyqqa shyqpas buryn nemese qandaı da bir qımyl jasamas buryn olar qajet temperatýrany jınap alýlary kerek.
Qoltyraýyndar qozǵalmaıtyn ári enjar bolyp kóringenimen, reaktsııalary óte jyldam bolyp keledi. Eń qyzyǵy da sol, qozǵalyssyz jatqan dene aıaq asty bárin joıǵysh jaýyzǵa aınalady. Almatynyń haıýanattar baǵynyń keıbir qonaqtary buǵan kýá da bolǵan. Uzyndyǵy úsh metr qoltyraýyn Fıdel terrarıýmdaǵy áınekti syndyryp, barlyǵyn dúrliktirgeni bar.
Tamaqtandyrý kezinde qaýipsiz qashyqtyqtan qoltyraýynnyń barlyq «ónerin» kórýge bolady. Keıbir haıýanattar baǵynda bul sharany qonaqtarǵa arnalǵan shoýǵa aınaldyrady. Máńgilikke este saqtalyp qalar bul sátti tamashalaý úshin ondaǵan adam jınalady.
Almatynyń haıýanattar baǵynda Tserber laqap atymen sıam qoltyraýyny bar. Mundaǵy qyzmetkerlerdiń aıtýynsha, laqap atyn minezi óte aýyr Tserber esimdi tóbetke uqsatyp qoıǵan. Bul qoltyraýyn áli kishkentaı, uzyndyǵy shamamen 1,5 metr, egeýquıryqtardy jaqsy kóredi. Zına esimdi kaıman qoltyraýyn kólemi men minezi jaǵynan Tserberge uqsas. Alaıda, zoobaq qyzmetkeri Mıhaıl Sorokoýmovtyń aıtýynsha, ol budan ary óspeıdi, sebebi tabıǵaty sondaı. Aıtqandaı, qoltyraýyn Zına 1972 jyly týǵan jáne ol Almaty haıýanattar baǵynyń eń uzaq ómir súrip kele jatqan reptılııasy.
Foto: Mıhaıl Sorokoýmov
