Almaty zoobaǵynda kemtar jyrtqyshtyń taǵdyry týraly aıtty
Jaqynda zoobaq basshylyǵynyń sheshimimen ıagýar ashyq volerge kóshirilgen bolatyn. Bir aıaǵy men quıryǵy joq janýar kelýshilerdiń arasynda da əleýmettik jelide de biraz shý týǵyzdy.
Adamdar zoobaq basshylyǵynyń əreketin qatty synǵa aldy.
Erjan Erkimbaev búgin Instagramdaǵy paraqshasynda Dıananyń ómiri týraly aıtyp berdi.
«2007 jyly kúshik kezinde ony eresek ıagýar talap, quıryǵy men aıaǵyn shaınap tastaǵan. Sol ýaqyttan beri qoǵamnyń talqysynan jasyryn ustaǵan. Negizi ereje boıynsha Dıana sııaqty (kemtar-avt) zoobaq janýary ekpemen óltirilýi tıis. Biraq men əli oǵan daıyn emespin»,- dedi mekeme dırektory.
Onyń aıtýynsha, zoobaqta taǵdyry talaıly janýar óte kóp.
«Bizde ondaı janýar óte kóp. Dıana 10 jyl boıy qysy jazy tar tordyń ishinde tar qapasta ómir súrip kelgen. Biz aýa jutsyn kún shýaqtasyn dep shyǵardyq», - dedi ol.
Dırektor basqa da kemtar janýarlardy el kózinen jasyrmaıtynyn əri olardy óltirmeıtinin aıtty.