Almaty zoobaǵynda Kaspıı ıtbalyǵy paıda bolmaq

ALMATY. QazAqparat - Almaty zoobaǵy NCOC kompanııasymen birge kaspıı ıtbalyǵyn zertteý men saqtap qalý boıynsha ǵylymı jobany júzege asyrmaq. Bul týraly búgin «Almaty haıýanattar baǵyna kómek kórsetý áleýmettik qory» qoǵamdyq keńesiniń tóraǵasy Raıymbek Batalov aıtty.

«Másele qazir munaı óndirý kompanııalarymen birge talqylanyp jatyr. Olardan da kaspıı ıtbalyǵy máselesin zertteýge mıllıardtaǵan qarjy bólinip jatyr. Biraq sonda da ǵylymı zertteý baǵdarlamasy joq. Sol bólinip jatqan qarjyny Almaty haıýanattar baǵynda sırek kezdesetin janýarǵa arnaıy oryn daıyndaýǵa baǵyttaý kózdelgen. QR Premer-mınıstriniń birinshi orynbasary Darıǵa Nazarbaeva atalǵan jobany quptap, Qazaqstanda zertteý baǵdarlamasy bolý kerektigin aıtty», - dedi R.Batalov.

Onyń aıtýynsha, jaqyn arada kelisimge qol jetse, Almaty zoobaǵynda kaspıı ıtbalyǵyna arnalǵan meken paıda bolady. Sondaı-aq, jańa nysan Kaspıı ıtbalyǵyn saqtap qalý men kóbeıtýge baǵyttalǵan ǵylymı ortalyqqa aınalady.