Almaty zoobaǵynda Búkilálemdik kerikter kúni toılanyp jatyr
ALMATY. QazAqparat - Almaty zoobaǵynda Búkilálemdik kerikter kúnin toılap jatyr, dep habarlaıdy QazAqparat tilshisi.
Alǵash ret munda kerikter 2002 jyly Ońtústik Afrıkadan ákelindi.
Sodan beri janýarlar jaqsy jersinip, kóbeıip keledi.
17 jylda 15 tól dúnıege keldi.
«Atalyq Han men analyq Gratsııa men Sulýdyń urpaqtary. Olardy tamaqtandyrǵandy úlken de kishi de unatady. Biraq olardyń tómen jıiliktegi daýsyn áli eshkim estigen joq. Olardyń uıyqtaǵanyn da tiri jan kórmedi. Kerikter bar joǵy 1 saǵat uıyqtaıdy. Ár mınýt saıyn oıanyp, jan-jaǵyna qaraıdy. Sosyn qaıta uıyqtaıdy. Bul jyrtqyshtardan saqtanýdyń daǵdysy bolsa kerek», - dedi zoobaqtyń baspasóz qyzmetkeri Mıhaıl Sorokoýmov.
Búginde álemde 90 myńǵa tarta kerik qaldy.
Kerikter esineı almaıtyn álemdegi jalǵyz janýar. Olarǵa kóbine arystandar ǵana shabýyl jasaı alady.
Bir táýlikte bar-joǵy 60 mınýt qana uıyqtaıdy. Tólderi týa salysymen 1 saǵat kóleminde júrip ketedi.
Keriktiń jasyn terisiń túsine qarap anyqtaýǵa bolady. Qońyr tartqan saıyn eresek kerik dep tuspaldaýǵa bolady. Onyń terisindegi sýret adamnyń saýsaq izi sııaqty qaıtalanbaıdy.
