Almaty zoobaǵynda «Afrıka savannasy» kesheni salynady

ALMATY. QazAqparat – Almaty zoobaǵy «Afrıka savannasy» kesheni qurylysynyń eskızi men jobalyq-smetalyq qujatyn daıyndaý ústinde. Bul týraly zoobaq ujymy jelidegi paraqshasyna jazdy, dep habarlaıdy QazAqparat tilshisi.

Zoobaqtyń málimetinshe, keshende aldaǵy ýaqytta pilderge, sýsıyrlarǵa, kerikter men antılopalarǵa jańadan qysqy jáne jazǵy qorshaý salynady.

Sonymen qatar, sý tazartatyn qýatty qondyrǵysy men aýa tazarqyshy bar basseın salynady.

Qurylys jumystary 2024 jylǵa josparlanǵan.

Sonymen birge, zoobaq ujymy jelide sýsıyrlarǵa arnalǵan qurylystyń tym eski, ótken ǵasyrdyń 60 jyldary salynǵanyn, janýarlarǵa arnalǵan jańa pavılondar salý tez iske asatyn jumys emes ekenin eske saldy.

«Zoobaǵymyzdaǵy Djambo men Lottı atty sýsıyrlardyń qorshaýyndaǵy sýdy kúnara aýystyrǵan saıyn, arada bir saǵat ótpeı jatyp sý laılanyp ketedi. Ókinishke qaraı, bizdiń keıbir kelýshilerimiz bul tabıǵı jaǵdaıdy túsinbeı, janýarlar las jaǵdaıda ustalady dep oılaıdy», - dep jazdy zoobaq ujymy.